عدد الضغطات  : 2391

سبحان الله وبحمده سبحان الله العظيم


   
 
العودة   الملتقى الثقافي لأبناء قبيلة العوازم > ( الملتقى الأدبي ) > ملتقى الشعر المنقول
 
   

ملتقى الشعر المنقول الاقسام الفرعية: ملتقى القصائد الصوتيه المنقوله

إضافة رد
 
أدوات الموضوع إبحث في الموضوع انواع عرض الموضوع
قديم 10-03-2009, 08:00 PM   رقم المشاركة : 1
معلومات العضو
نواف القريني
 
الصورة الرمزية نواف القريني
 

 

 
افتراضي الامير الشاعر حجاب عبدالله بن نحيت

بسم الله الرحمن الرحيم


حجاب عبدالله بن نحيت الحربي منو فينا مامر عليه هالاسم , إحنا طبعا واغلبنا نعرف هالشخص من خلال اغانية المعروفة والي انتشر فيها لانه برز كـ مغني لا شاعر , ولا يفوتنا انه كان من ابناء احد امراء حرب وتستغربون اشلون شيخ وبدوي ومن امراء قبيلة ويغني ....


لاشك ان الظروف كانت تلعب دور بهالشغلات .. حجاب بن نحيت من سكان نجد بالمملكة العربية السعودية له ابناء اكبرهم اسمة ناصر وفيهم واحد اسمة زياد وهو مشارك بـ برنامج شـاعر المليون...



حجاب معروف عنه انه من اكبر تجار الاسهم بالمملكة وله عمارات واسواق بالمملكة العربية السعودية وهو حاصل على شهادة الثانوية العامة ولم يكمل بعد الثانوية لظروف خاصة فية

اما عن سبب غنائة وهو امير قبيلة

الكثير منا يعرف ان حجاب يحب بنت عمة .. ولاشك بالامر هذا قصيدة الي يقول فيها

______________:


يابوي انا طال انتظاري ومليت .... صبري نفذ ماباقي الا قليلة



صبرت يابوي وتحريت وابطيت ... والخالق ارجي رحمتة واشتكيلة



ماعاد ينفع بي دوى لو تداويت .... والامر لله مامع العبد حيلة



حبيت بنت العم حبيت حبيت ... من قبل لاتربط على الراس شيـــلة


وسبب الغناء معروف...


كان حجاب يرسل لبنت عمة مراسيل تعرفون قبل مافي تلفونات نقالة ولا ارضية يمكن بوقتة

وكان بعض الناس الي يوصلون رسايلة يغيرون بالكلام .. يقول



(( يالي تودون الكلام المحرف ..... ماتوصلونة كامل إبلا إختلافي ))


طبعا نعرف انه لجأ للغناء لانه ماله طريقة غيرها يوصل صوتة وكلامة لبنت عمة غيرها

كثير من اللوم والمشاكل صارتله بسبب الغناء ... يقول



بس وشعليكم مني .. وشليكم بي وبفني ... يمكن مجبور اغني .. لوماهي طابايعنا



وايضآ ....


يالي تلوموني كفى لاتلومون ... ولاتضيق خواطركم لوني تعذيت


يمكن بهالتعذيب راضي وممنون.... ولا على طول الزمن قد تدربت


وايضـا ....


يلومني بالحب ناسن ملقف.... الي محبتهم محبة هرافي


ياناس انا بحالي دارى واعرف .... وشعاد قلتم مابك الا العوافي




حجاب له قصايد كثيره وإنشالله راح اسلسلها لكم كل موضوع قصيدتين حتى يتسنى لكم القرائة ومعرفة القصايد الاكثر ميول لقلوبكم وسامحوني على القصور هذا الي موجود عندي بالكتاب وعساني عرفت اعطيكم شي عن سيرة هالشاعر واستفدتم منه .


إنتظرو الباقي انــشالله ...


ملاحظة / حاولت ادرج صورة لكن الايقونة ماتفتح معاي ولاحتى لون الخطوط واحجامها الرجاء من الادارة الموقرة الالتفات لهشغلة ومعرفة الخلل مني او من الصفحة وشكرا ....

تحياتي

نواف القريني







آخر تعديل نواف القريني يوم 10-03-2009 في 08:04 PM.
رد مع اقتباس
قديم 10-03-2009, 08:23 PM   رقم المشاركة : 2
معلومات العضو
طلال العازمي
 
افتراضي

السلام عليكم ورحمة الله وبركاته


بسم الله الرحمن الرحيم


الصلاة والسلام على أشرف الأنبياء والمرسلين سيدنا محمد وعلى آله وصحبه أجمعين


مرحبا بك أخي في الملتقى


اولا : الله يعطيك العافية على الموضوع فعلا حجاب عبدالله بن نحيت شاعر و فنان شعبي

ولكن اشتهر و ظهر في الفن الشعبي

من بعض قصائده :


لي قصةٍ عنها اكثر الناس يدرون = مع عالمٍ لا قابلوني تكهربت
ناسٍ اليا مروا مع السوق يمشون = اضيع ما اعرف الثلاثاء من السبت
اللي نسيتوا مالكم حق تنسون= يعني نسيتوني لأني تغيبت
اغيب وكل الناس مثلي يغيبون= كم بالقرى ناسٍ لهم ناس بالخبت
صديت واهل الحب عاده يصدون = لو الغلا بقلوبهم نابتٍ نبت
يخشون ناسٍ يرقصون ويدقون = هذا جرى يمكن وهذا جرى ثبت
وانا ولو صديت ما زلت مرهون = وش عاد لو في بعض الاوقات جنبت
أعيش في جوٍ (ن) من البعد محزون=من يوم عن ديرة حبيبي تغرّبْت
اللي تلوموني كفى لا تلومون= ولا تضيق خطركم لو اني تعذبت
يمكن بهالتعذيب راضي وممنون= والا على طول الزمن قد تدربت
وانا ادري ان الناس مثلي يحبون = لكن ما تعبوا مثل ما تتعبت
اظن ما محدٍ حب مثلي بهالكون= ولو قص واحد قصتي كان كذبت
شيٍ يخلي كامل العقل مجنون= ما كنت اصدق بالهوى لين جربت
هذا الخبر والحال من دون في دون= وانا خلاص من النهايه تقربت
:::::::::::::::::::::::::::::::::::::::::::::::::: ::::::::::::::::


اما حصل شوفك على القرب باسلوب = ما تنفع الوقفه ورا زلفه الباب
جرحتني جرحٍ مقدر ومكتوب= ستين يوم الجرح ينزف ولا طاب
والله لو اني على الامر مغلوب = لأاقعد بداري من مساجين الاحباب
واصبحت انا مابين طالب ومطلوب = الحق عندك وانت له صرت طلاب
نقيتكم من بين عشرين محبوب= يا خوفتي ان كان ظني بكم خاب
اخاف قلبي ينصهر صهر ويذوب = ويصير شي ما حسبنا له حساب
ان ما حصل حبٍ على صفه قلوب = ما يتفق بالحب صادق وكذاب
وانا ترى مجبور اسميك حبوب= واهل الهوى بقولوا الحب غلاب
غلاب يغلب من تنى والمنى كوب= وشلون انا اللي شاربٍ عشره اكواب
وانا لو اقوى اتوب والله لاتوب = لكن ما واحد وقع بالهوى وتاب
:::::::::::::::::::::::::::::::::::::::::::::::::: ::::::::::::::::




نارٍ بكبدي تشتعل آآآآه اوف اوف = بالله نادوا لي جنود المطافي
مذكور بالدوحه غزالٍ يوصف = يخشى عليه من الحسد لو يشافي
بأبيض شفرر سته وستين يعرف = يستاهله ابو الثمان الرهافي
يلومني الحب ناسٍ ملقف = اللي محبتهم محبه هرافي
ياناس انا في حالي ادر واعرف= وش عاد قلتم ما بك الا العوافي
وانا ادرى اني بالمحبه مكلف= واشوف ميلتي وجهتي وانحرافي
ادري ولكن ما استطيع اتصرف = الا بميزان الشعر والقوافي
يا ليت من يوصل كتابٍ مظرف = ويجيب شرح من اريش العين وافي
اللي تودون الكلام المحرف = ما توصلونه كامل بلا اختلافي
قولوا لها تامر علي واتشرف = اجي على الاقدام لو كنت حاوفي
او قولةٍ سرعه تجي لاتخلف= ياللي تجيها قلها لا تخافي
الجسم ينشف ليه وش لون ينشف= الى حصل حبٍ تلاه العيافي
تشهد على حبي ( شبابه وخندف) * = واللي سمع يشهد على باعترافي
* شبابه وخندف:: حلفين كل حلف يتكون من 7 قبائل
حيث انقسمت القبائل في نجد والحجاز الى حلفين بسبب الحروب والمعارك
:::::::::::::::::::::::::::::::::::::::::::::::::: :::::::::::::::::::::::::::



هل الشهر وازدادت العين باشرار= واشارت العبره ببادي شهرها
واشارت العبره دموع ٍ من النار =وعيني تزايد معها من قشرها
وامسيت قلبي تقل في غب الابحار = تضربي الامواج غبه بحرها
تضربي الامواج في غب الابحار = تومي بي اوماي الهوا في شجرها
على حبيبٍ عنه ما عاد نختار = اللي معاليق الضماير مزرها
ابوجديلٍ فوق الامتان نثار = والخد نوارٍ تعاقب زهرها
وعين اشقرٍ لا شافه الجول ما طار= لا دق في جول الحباري عثرها
ما دوجت بالسوق مع كل عطار =ولا علقت عند المصور صورها
ادعج غنج عوده طري تقل جمار =اصفر عفر كن القمر في نحرها
اتلى العهد فيهم عقب شهر الافطار =مع ضبط بدوانٍ تنحت ديرها
اقفى ولاجاني منه رداد الاخبار =حتى الطراقي ما لفوا في خبرها
يقول سعدي في تماثيل الاشعار= الله من عينٍ تزايد سهرها
:::::::::::::::::::::::::::::::::::::::::::::::::: :::::::::::::::



عسى الذي شال قلبك ما يتهنى بك = وانا عسى الله يجيب اللي يهنيني
واصرف من الدمع واقيد على حسابك = واقول يومٍ من الايام يوفيني
وتعيش مرتاح بين اهلك واقرابك = وانا يتكرم علي اللي يحاكيني
واخجل وارحمك واقدرك واهابك = وادراك والله مثل ما ادرى على عيني
مبلي ويا ويل من يا زين يبلى بك = يصير مثلي عسى ربي يعافيني
الله من ليلةٍ قابلت فم بابك = واقول ليت يهديه الله يناديني
مسكين يا قلبي الشوؤم وش جابك =لهم ومن جابني يومٍ يوديني
يا دهر لا تقطع اضلاعي بانيابك= يجوز واحد من اقصى الناس يشريني
:::::::::::::::::::::::::::::::::::::::::::::::::: :::::::::::::::::


يا حبيبي انا مع مين اوصي لك =خاف ارسل ولا تاصل مراسيلي
وانته ابطيت ما جتني مراسيلك = وش اللي يردك ما توصي لي
كل من شاف حالي قال يا ويلك = واشهد انه صحيح وآآآه يا ويلي
خلص العمر ما خلصت بهاذيلك = كل يومٍ اقول اليوم تصفي لي
لو يشوفك طفل وقف يغني لك = اما انا كل قاسي يبكي لي
ما نفع فيك تدليعك و تدليلك = كل ما ازيد صبر تزيد تنكيلي
:::::::::::::::::::::::::::::::::::::::::::::::::: :::::::::::::::



اتصبر عسى الله يفرج الهم عني =واخفي العلم وامشي بالجروح الخفيه
غير ظبي المها يا ناس محدٍ شحني =اسهر الليل ما امسي دوك عيني شقيه
يوم خلي بسهم الموت وقف وطعني = ما يفيده دوا جابوا من الصيدليه
لا تلوموا القريني لو بصوته يغني = كم واحد يلومه ما فهم بالقضيه
كل ما جزت من طرد الهوى عاضني = عارضني وانا في سكه الصالحيه
من سهوم المحبه والموده رمني =والجروح القديمه اللي تنقض عليه
ليتهن يوم مرن وقفن وادعني=يوم قفى مسند ناحرين الحويه
المها في هواهن يالربع عذبني =جعل ربي يوفقني حياةٍ هنيه
:::::::::::::::::::::::::::::::::::::::::::::::::: :::::::::::::::::



اجل مع مين اتكلم =ومع من للحب اتعلم
يعني اسكت واتألم = ما اقول شي ولا المس شي
يعني مش قدك يعني =او يعني ما تسمعني
او بتحب تلوعني= او قالوا لك لاجا عي
لما تمرق من جنبي =ما تحاكيني وش ذنبي
يعني مش ملزومن بي= او على شان اصلي بدوي
بالله لو تسمح وقف = واعتبرني متلقف
واللي ماهو متثقف= يسمح لو مهما يخطي
لا صغيّر وارجي تكبر = ولا غايب وارجي تحضر
ولا مريضٍ مضطر =كمال وجمال وحي
لو نعمل كشفٍ طبي= على حبك وحبي
يمكن حبك متغبي = والا يمكن حبك نيّ
تصور حالك بتحب = وتعالج ما تلقى طب
ومحبوبك يشتم ويسب= لو فرضنا انك مثلي
واصير انا حبيبك =وتغازلني ما اجيبك
واعمل على تعذيبك = وألعب بك كوره برجلي
لما سمعته شكواي =رد بدلع واستهزاي
تبغى اشيلك في مخباي =والا احطك في عيني
كل العالم بحبون =اكثر منا يا مجنون
تشهد شركه نجدي فون= كم واحد فيها بيشكي
ليه الصد الي هالحد=صافحني من يد لـ يد
عاهدني وانا اتعهد= اني لك وانك لي
حكم في حكمك غيرك =تعرف قوه تأثيرك
انا مقبل تقريرك = مدام انه على هالزي
لا تحرمني شبابي = تحكم حكمٍ غيابي
ارحمني لاجل اصحابي=والطف باحوالي يا خي
قل كلمه على هونك =تطلع من بين سنونك
مثل كلمه وشلونك= اسمعها وارتاح شوي
الحب اللي من هالنوع = منه اسم الرحمه ممزوع
فيه الميت والمصروع =اسهل من جرعات المي
هذي هي آخر دعواي = اسمها مسجل im
شعري والحاني وغناي= انتاج افكاري و ايدي

:::::::::::::::::::::::::::::::::::::::::::::::::: ::





يا ويل من يجرحنه =بيض العذارى المفاريع
يموت من صوبنه= والموت ما فيه ترجيع
يشعر بأنه بجنه =وانه يقوم مشاريع
واليا استمر اجدعنه = .............
حبي لهن اشترنه = غصبٍ وانا كنت ما ابيع
في خاتمٍ ارسلنه =دبله لأحدى الاصابيع
فكري لهن احرفنه =واصبحت لا اسمع ولا اطيع
البيت يوم ادخلنه= ما قصدهن غير تشجيع
قالن على شان فنه= جينا لحبه مطاويع
ياحظ من زاورنه =لو كل عشره اسابيع
ويصير للبيض منه= لو الزياره تقاطيع
يا زين توصيفنه= اليا طلعن بالدراريع
ونيت عشرين ونه =يوم اكشفن لي مصاليع
قلبي ارتبش وانفضنه= يوم ارفعن البراقيع
فكري الذي دهورنه= يشيّبن المراضيع
واللي علي اطلبنه= كتابة اسمي بتوقيع
والقلب معهن خذنه =يوم اصبح الهرج توديع
::::::::::::::::::::::::::::::::::::::::::::::


مرحبا باللي لفاني =جادلٍ عوده لياني
يشتكي ضيم الزماني =بالهوى مصاب
مرحبا بي مرحبا به =يشتكيني يا عذابه
صار مابي مثل ما به= به عذاب وبي عذاب
مثل ما همك براني = تلني تل الشيطاني
سم حالي في زماني = ود مجلي العذاب
جادلٍ حرق عليه = يوم جاء يمشي عشيه
شوفته فيها المنيه =عينه بها الكحل ذاب
::::::::::::::::::::::::::::::::::::::::::



على يوم ويوم= راحت حياتي آآآآه
ما دام انا محروم= طيب اشتكي لله
ان غاب غاب النوم = غاب الفرح وياه
صار السهر لي دوم = عايش على ذكراه
ويا عيب الشوم= اخلف علي مبداه
بعد المحبه قوم= اخيه وا عيباه
ذا حبنا المرحوم= ليش اعتذر وانهاه
بعت بأول سوم =بلاش من دنياه
ابقى بدون هموم=افارقه وانساه
والهوى مظلوم= من مثله وشرواه
طبعا وذا مفهوم=صار الهوى مأساه

::::::::::::::::::::::::::::::::::::::::


يالحلو الحالي محلاك= يا احلى كل الحلوين
مافيه بالدنيا حلياك= الا مع الحور العين
نورك من خلف الشباك =يجهر مثل الاكسجين
وشلون اميز بهاك=وانا اغمض لا تعمين
الله يا سيدي يحماك= من عيون الحاسدين
يسعدني عزك وارضاك=يفرحني لو مالي شين
انا عايش في ذكراك = خيالك دوم يبارين
ابدا ما والله انساك = حتى ولو غبت سنين
واحب سيتك وحسناك = مهما صرت من القاسين
شلت وصاتك لاجل ارضاك =ماانسى يوم انت توصين
اقصى مالي قلبي هاك = خذ قلبي وامش بقلبين
مملوك وبأيد الملاك = تبعدني والا تدنين
الله يامرك وينهاك= يهديك الله قل امين
بأجمل زين الله سواك = صنعة رب العالمين
كن اسنانك بين اشفاك =لؤلؤ مصفوفٍ صفين
والموت بمقرن حجاك= يذبح ذبح بلا سكين
اخير روحي تفداك= يا روحي يا نور العين
انا احبك وانا اهواك = تبغضني والا تغلين

::::::::::::::::::::::::::::::::::::::::::::::::


يالله يالمعبود يا رب الارباب= يامعطي الجنه بلا قيد وحساب
ياجامعٍ شمل الاحبه والاصحاب= يا محصيٍ عد الاوادم والادباش
انك تحقق مطلبي دون تقصير = وانته تعرفه دون شرحٍ وتعبير
شره كبير ولا حصل لي منه خير=من شانها ما مرهٍ رحت طراش
ومقابل بلاده على غير حاجه =تلعب بقلبي لعب ورعٍ بعاجه
والقلب من يمه تعذر علاجه = ما اعيش من دونه ولو رحت ما عاش
بنت صغيره تو زمة نهدها = ما طلعت ديده ترضع ولدها
قضت حياته بالمعيشه وحدها = ما دلهت طفله بصوره وقرقاش
واقرونها ما غالطوها هل الهند = وعيونها تقول ساعات وستند
وان طالعت ترسل صفوف من الجند= ومسلحينٍ بين مدفع ورشاش
لأجله تشبت بملابس عذارى = اسهر بليلي واختفي بالنهارا
اجري بلا مصلوح سر وجهارا = غير الجلوس وبحث الاوضاع ماانهاش
لو كنت في مالي وروحي مفادي = ما اقدر ابين قصتي للاعادي
اجي واروح وحسرتي في فؤادي = مسكين من يقبل ويقفي على ماش
ليت اتوظف عندهم في سكنهم = يوم ان ربي بعد الرحم عنهم
والله ما اسافر ولا اروح عنهم= لو شغلوني عندهم نوع فراش
اقوم بالواجب بجد وامانه= يحرم معازيبي تجيهم خيانه
ماني بماشي في دروب اللعانه= اجي بدرب الخير وادفع لهم كاش
واخذ حبيبي واهتني في حياتي= واغنم زماني قبل تدني وفاتي
صيور عمر المرء قبر ومماتي = وملحفينه خمسه اذرع من الشاش
:::::::::::::::::::::::::::::::::::::::::::::::::: :::::::::::::::::::::



انا كل ما هب الهوى يا هلي ونيت= تذكرت ايام الهوى اللي مضت ليه
ليال السعاده والهنا بعدها انضريت = ومن شافني قرر حلول القدر فيه
واكبر دليل بما ذكرته الى غنيت =تسيل الدموع اللي ورا العين مخفيه
على طول يطرا لي متى بالوتر دقيت = بعيني تمثل صورةٍ له خياليه
ومن حبني حطيت له بالضماير بيت= ولا احب من حبه محبه صناعيه
و انا لا ذكرته صرت ما بين حي وميت = بنيه اصير وباقي الناس في نيه
فعن من يريد القلب وسط النهار احديت = ونعمه يجي يمي وانا ما اقدر الجيه
وهل ينفع المقهور ترديد كلمه ليت = مقاس الهوى بلغ فينا بالميه ميه
اعرف الذي سعى بالافراق والتشتيت= وحيثه عزيزٍ عندها قاصر ايديه
ابا اصبر واحاول واطلب الله الى صليت = يعيد المياه الى المجاري الطبيعيه
:::::::::::::::::::::::::::::::::::::::::::::::::: :::::::::::::::::::::::::


ويلي منك يا ويلي وانت من الله يا ويلك = تسهرني لآخر ليلي وتنام من اول ليلك
وان كان انك ما تدري ارسل واحد يدري لك =ارسل مرسولك مدري ياخذ لك ويودي لك
واقول اني حبيتك يوالله يا حبي لك =ياما بنومي ناديتك وياما اشتقت لتقبيلك
ليتك تكتب تعهد واتجيبه لي امضي لك= اني لك لك وحدك يا بعد عمري كلي لك
ياللي جرحك طول بي يكفي يكفي دخيلك= عيني بتقول لقلبي لا تشكي لي ابكي لك
والمهم انته همي وانته قلبك دليلك=وان كانك منت بمي تعال ادفن قتيلك
:::::::::::::::::::::::::::::::::::::::::::::::::: ::::::::::::::::::::::::::::::::::


ياويع القلب عندك لا يضيع = احفظه حتى يحين الاجتماع
واحتفظ به يا ويع = لا تفرط به يضيع
ربما الايام تجمعنا جميع = ثم نلقى الحب قد بدد وضاع
يا حبيبي الحب ذا ماله شفيع= كل نفسٍ منتهاها للضياع
هاك اسرار المحبه يا وديع= حطها باقصى المظاليل الوساع
خل دنيا الحب تضحك للجميع =لا نعيش العمر بقلوبٍ وجاع
يا وديع العمر ذا زهره ربيع =وانما الدنيا جعلها الله متاع
لا تريني الحب من بالٍ وسيع = وانا بالحب عجل الاندفاع
لا تحملني بما لا استطيع =او تعاتبني اذا حان الوداع
رغم اني للهوى عبدٍ مطيع= ما اتحمل فوق قدر المستطاع
:::::::::::::::::::::::::::::::::::::::::::::::::: ::::::::::::







كنت جنبـي كـلٍ يشاهـد الثانـي=مير هالحين انت وينك وانا وينـي
بالسعوديـه وخـلـي بخيطـانـي=الـف كيلـو حايـلٍ بينـك وبينـي
لو حبيب الـروح لاجيـت حيانـي=كان آصلهم لو امشي على عينـي
ياحبيبي اصبر على العيب من شاني=مثل ماني صابـرٍ وانـت تكوينـي
افتخر بأسمك مع افـلان وفلانـي=احسب ان الاسـم ينفـع ويغنينـي
معي عنوانك وانا ارسلت عنوانـي=طالت المده وانـا انقـل عناوينـي
كم كتاب ارسلت والـرد ماجانـي=صابرٍ ياكنـك اصبحـت ناسينـي
وابتلـي بالحـب قلبـي وعنانـي=وش ذنوبـي ليـه قلبـي يعنينـي
من سبايـب واحـدٍ يـوم وفانـي=كـن فـي عينيـه نـورٍ ينادينـي
يااريش العينيـن ياعـود ريحانـي=وين ودك مـع طريقـك تودينـي
صرت لي يازين غايـه ونيشانـي=لازم اخـاويـك وإلا تخاويـنـي
مايصيـر انـك تمـر وتعـدانـي=مثـل ماراعيـك لازم تراعيـنـي
لاتخليني مـن الحـب مرضانـي=وانت يالمجمـول تقـدر تداوينـي
:::::::::::::::::::::::::::::::::::::::::::::::::: :::::::::::::::



ياحبيبه لو اني تقل بهلوان =قبل اشوفك وانا من العاالم العاقلين
لا تظني بإنا وراثين الجنان= لا تحكمي علينا قبل تتأكدين
واسالي اللي يعرفوا حالتي من زمان = اسألي كل جيراني شمال ويمين
اسألي وابحثي قولي لهم كيف كان = يتضح لك بأن مرت علي حالتين
واكتبي عن قصه حياتي بيان= وانشري شرحج الوافي عن الصورتين
حددي كل شيءٍ بالزمن والمكان=للأجابه لو قدر بأن تسألين
ياغزال تغازلني عيانٍ بيان= مقدر ادخل معج بالحب لا تزعلين
خايف من التقلب قدمي لي ضمان=واضمني لي حياة الحب لو تسمحين
لو لأجلك رضيت ان الكرامه تهان=فاعلمي ان لي ربعٍ بها مطالبين
آآآه ياليت عرفك حاصلٍ من زمان =ليت ما فات من عمري وعمرك سنين
ليتي اعرفك من عمري وعمرك زمان=ليتي اعرفك يومٍ كلنا صغيرين
او بلاشي وخلينا بجوٍ امان= لا تمري امام عيوننا كل حين
:::::::::::::::::::::::::::::::::::::::::::::::::: :::::::::::::::::::::


بس اشعليكم مني = وش لكم بي وبفني
يمكن مجبور اغني = لو ماهي طباعنا
يمكن اكثركم سالي = ما يدري شي عن حالي
وانا الشر عبالي. =.في حانا ومانا ضعنا.
حني ليه محنه =ترى قربك لي جنه
كلمه لو فيها منه =ترى كلش يقنعنا
مش لازم ترحم مره= لا ضر ولا مضره
بس تسبب في حره = بنص عيونك طالعنا
تقطع فينا ما تاصل = ولا تعمل دونك فاصل
انا باقول الحاصل = لا متنا وش تنفعنا
تفجعنا ما تراعينا =واجب تتحكم فينا
بس تمر وتشقينا = ولما نطلب تمنعنا
كلا ما تنصف كلا = تتشقينا وتتخلا
اما تجمل والا = اتركنا ولا تلوعنا
حبك في قلبي لاجا =ومحرم المخرجا
انت الامل والرجا =من وصلك لا تقطعنا
ليش وليش تكايدنا = تقربنا وتبعدنا
من حنانك زودنا= ما ياسعك ياسعنا
وش معنى ما تسمعنا = مش رايح تجلس معنا
حاكيناك ولا رديت = اما آصل والا دعنا
والله حبيتك بكثير = وعن حبك ما بستخير
اما ارحمنا من التعزير = او لا تجي شارعنا
:::::::::::::::::::::::::::::::::::::::::::






مرت علينا سنين ما نسهر الليل= ولا نشتري لدموع الاعيان مناديل
واليوم صرنا عكس هذا تماماً= سبب عيونٍ كنهن الدرابيل
تقل درابيلٍ يمدونها شيوخ= وهم في الدوحه يشوفون صلبوخ
سبب خدود الحمر قمر تقل خوخ= غطن عليهن الرموش المظاليل
سبب كثيرٍ من صفوف الجدايل= جدايلٍ تكفي شعوب وقبايل
مالن ومال الراس والعنق مايل = واخشى عليها لا يجي جسمها الميل
قالت تكلم قلت ما اقوى اتكلم = قمت اتشكى عندها واتظلم
وانا احسبني بس كنت اتحلم = وانا الضحى واحسبتني تالي الليل
والمشكله ان مالها بما جرى اهداف = الا لأظهار المحاسن والاوصاف
تبيني اسرف في هل الحب اسراف= وازيدهم ويلٍ و ويلٍ على ويل
:::::::::::::::::::::::::::::::::::::::::::::::::: ::::::::::::::::::





ترى الحب يا اهل الحب له سلمٍ مجهول = كثيرا من العشاق ما يعرف ابوابه
فاول شروط الحب تمشي بكل وصول = ترى الحب مش قوه بسيفك تهقوابه
وثاني شروط الحب تترك كثير القول = وتتجاهل وماكل ماصار يحكى به
وثالث شروط الحب لا تأتمن مرسول = ولو كان يقربك وإلا من اقرابه
ورابع شروط الحب لا جا الخبر منقول = فلا تتبعه خله وخل الذي جابه
وخامس شروط الحب لما يكون مشغول = فلا تكثر النشده وتعرض على بابه
وسادس شروطه كان زوله يراقب زول= وعرض بدربك صير كنك تهزابه
وسابع شروطه خذ كلامه على المقبول = يحب التحدث والتكلم بما صابه
وثامن شروطه لا تمد الدراهم طول = تغير محبتكم الى المال واحسابه
وتاسع شروطه لا تناظر ولا مجمول= وكن صافياً بالحب لا صرت مبلى به
وعاشر شروطه امش مشي الشرف معقول= وخذ هالوصايا العشر مني تمشى به
:::::::::::::::::::::::::::::::::::::::::::::::::: ::::::::::::::::::::::::::::::::::::




يا نجوم الليل ودن له كتاب = واسأل الندى يجاوب من جواب
صاحب لي صار غربال وعذاب= فاوضنه يالنجوم الساريات
ليت لي معكن مكان او مقر = ابعث الشاره وتأتي بالخبر
وعلى سطح القمر قرب الوتر=نبدأ استئناف ماضي الذكريات
يا نعيم العود غربالي يزود= خذت عقلي بالعيون السود زود
وبتعذينبي تعديت الحدود=كف عبرات العيون الشاقيات
عيل صبري يا نعيم العود عيل=والمنايا قربت وانت الوكيل
وامتلكت العمر مني والدليل= الجروح اللي بقلبي خافيات
ليتني ما شفت هدبات العيون=وابتسامة ....... منتزه الفنون
وخدوداً هاجمتني بالشجون =شوفهن لا شك متعه بالحياة
يا حبيب الروح ما غيرك حبيب = وانت يا سيدي سبب جرحي العطيب
وبنفس الوضع لي انت الطبيب= كان ما عالجتني حال الممات
كم حسبت الوقت ايام وشهور= راجياً لفت النظر بينا تجور
ما يجيز الحق لي منك الغرور=يفرض ان حقي دموعٍ سايلات
ان شمل عطفك مرادي ومناي=عشت مسروراً وذا احسن دواي
وان بخلتم يا حبيبي في رضاي=فدروب الموت قبلي سابقات

:::::::::::::::::::::::::::::::::::::::::::::::::: :::::::::::::::::


تسلم علي بكفٍ الين من الديباج= يا بخت كفي يوم لمست اياديها
وتعرض بخدٍ ما بعد لمسه المكياج = عسى الله يسترها وعسى الله يعافيها
تمايل بجسمٍ ينطوي كنه الكرباج = تذوب القلوب العاشقه من تثنيها
اجامل معه اضحك وانا داري اني داج= ومحتار بالدعوه اقوله او اخفيها
اخاف ان شرحت الوضع يحدث معاه ازعاج= علشان هذا ساكتٍ تقل ما ابيها
علشانها خليت الاعمال والانتاج=وصرت اعمل الاشعار فيها واغنيها
وحاولت اتعالج ولكن منين اعلاج = وهل للمحبه من اطباءاً تداويها؟
تداورد على قلبي بشكل افواج= همومٍ تبعدها واخرى تدنيها
من ابها الى عرعر لجده الى الافلاج =ادور الكرى واقول بلكي ألاقيها
:::::::::::::::::::::::::::::::::::::::::::::::::: ::::::::::::::::::::





يا ريم وادي الرمى= حجاب ويش احرما
السر ما يعلما= الا علام الغيوب
الهرج ماهو حرام= ردي علي الكلام
لا تبخلي بالسلام=بمصادفات الدروب
خذ صاحبك بالمهل =ولا تجي للزعل
احلم على من جهل= الحب ماهو حروب
قلي يا سيد السمر = متى علينا تمر
لو مرةٍ بالعمر = تشفي عليل القلوب
الحب ماهو بعيب= من عصر نوح وشعيب
لو كان دربه صعيب =من طاح به مل يتوب
يا عود جاك المسا= عساك تصبر عسى
لا تلومني بالقسى=لا صار بعد الغروب
اشكي على الله جفاك= يا بايعه من شراك
ربٍ سقاني غلاك= ......................
ان طعت شوري يا ابوه = عن الخروج امنعوه
الناس لو ينهبوه= وش فايده لو تتوب
يا ريم وادي القصيم=عذبت فينا يا ريم
اخرجتنا من النعيم = الى سمومٍ وشوب
::::::::::::::::::::::::::::::::::::::::::::::::



دخل عيونك يا دكتور = عندك دوا للمسحور
يا سيدي اعمل بي معروف = من اجل الله يا يادكتور
دخل عيونك داويني =عن حبيبٍ جافيني
ما انساه وهو ناسني= حبه بقلبي منثور
يا دكتور معذبني = مشقيني ومسيبني
في غرامه متعبني= وانا ما استطيع الجور
اتخيل حركاته = واتذكر بسماته
الله يبقي حياته= لو اني منه مقهور
قولة ايوه ثم لا = ومراره بعد الحلا
قولي لا والا هلا =من اول والا مشكور
لو قالت لي الصراحه = ارتاح وتبقى مرتاحه
ويبقى قلبي وافراحه= ما تولع بالمجبور
يا ليته ما ولعني = وجماله ما دلعني
ليت من اول لوعني= يبقى حبيبي معذور
لكن لما شقاني=صار يحاول هجراني
ونزلني بعد ارقاني=وانا بحبه مجبور
تمر ولا تكلمني = ماذا قصدك فهمني
تتحداني وتظلمني = وانا ما استطيع الجور
روحي بين اصبعيها = وجسمي ما بين ايديها
ولا اريد احد يعاديها = وهذا هو طبع المسحور
انا تعذب قلبي = واللي مسبب غلبي
بين المحبه سلبي= عايش بالدنيا مسرور
لا تتخلى عني =عطني حاجه تسكني
من معروفك طمني =انت الطبيب المشهور
:::::::::::::::::::::::::::::::::::::::::::::


الحب كله مشاكل = صرت لا اشرب ولا اكل
من حبيبٍ احبه =مقبل احدٍ يسبه
ما تفيد السوالف = غير خلي ما اوالف
رغبتي في المواصل = مير انا كيف ابا اصل
ان طلبته يجيني = قال ما اقدر يا عيني
كيف الشغل يقنع = يمنعونه وانا امنع
يالحبيب المترف =انت تقدر تصرف
الهوى شي فرضا= ماا اتنازل ولا ارضى
اتركوه بضميره =هو يقرر مصيره
راضيٍ فعلها بي = رحمتي او عذابي
من حل المصيبه =عن حبيب وحبيبه
:::::::::::::::::::::::::::::::::::::::::



بالله يا اهل العياه = ابي وريقه شهاده
قولوا اساس الحقيقه= عن الجروح العميقه
وان كان ما تعرفوها =اقولها واكتبوها
قولوا بأنه مريض= مرض طويلٍ عريض
قولوا بأن الدكاتر =شافوه وقالوا يا ساتر
قولوا ما يمكن علاجه = الا ان حصل وحده حاجه
بلكي يكون له حبيب =يشوف منها الغليبه
ماله علاجٍ لدينا= ومن العلاج انتهينا
حتى بعد ما يشوفه = وذاك بأيده يحوفه
لازم يكونوا جميعاً =داخل مكانا رفيعاً
واشك معها عريضه = شكوى لحالي المريضه
وألصق عليها طوابع = واقدمه بالاصابع
حتى يكون ما يصدق =اللي يجي ويتشدق
يقول لك ما يحبك = ولو حلف لك بربك
:::::::::::::::::::::::::::::::::::::::::::





يا حياتي غناتي يا فتاتي الحنونه = لو سمحتي تعالي
شوفي حالي يا مالي واعرفي كيف لونه=يكفي اللي جرا لي
يمكن اللي يودون الخبر يقلبونه = او يقولون سالي
قولي اهل الحسد من عندهم يصنعونه= من حكى لك حكى لي
اكثر اللي يضر اهل الهوى يامنونه = الرفيق الموالي
ودي اقول قول كلكم تسمعونه = من بلي ما يبالي
ما يبالي ومعه الحق لا تواخذونه = حالته مثل حالي
ما تعرف على النوم الذي تعرفونه = والسبب حب غالي
ليت من له حبيبٍ ساهرٍ يسهرونه = لأجل ما اسهر لحالي

:::::::::::::::::::::::::::::::::::::::::::::::::: :::::::::::::::::

المحبه بلاوي = رماياها ما ياوي
ماني عليها قاوي =ارجوك بس تنجيني
مثل ما احبك حبيني = صدك ذا ما يرضيني
حبيناك من شفناك= افتكرك وتنسيني
قلبي مع حبك مقرون = مثل النقطه مع النون
كل العالم ينامون = وانا ربي مشقيني
ضاق صدري وسدي باح =ولا فاده كثر الصياح
لا مزاح ولا افراح= عن العالم عزلتيني
قلبي حبك حب كثير =ولا ينفع قول وتكرير
وماذا يكون المصير =بالله خبريني
جسمي في حبك مشغول = في سمك وفي عرض وطول
وترايه ماني مسؤول= في حبك قتلتيني
ياما ياما ليالي سود = بين الشعر وبين العود
اسهر والعالم رقود= بالحب امتحنتيني
حبيته والحب مصيبه = والمحبه مش غريبه
كلٍ بنى له نصيبه =مش وحدي الحب متحديني
وماذا تكون النهايه =يالابسات العبايه
هيه دايه وادوايه = وغيره محد يداويني

:::::::::::::::::::::::::::::::::::::::::::::::
يا ناس دلوني= بشوف بعيوني
حذرى تلوموني= النفس مبليه
كثر البكا فتاك= ان ما ذبحك اعماك
يا صاحبي لولاك= سالم بعينيه
عيني تهل دموع= الصاحب المربوع
ما ترحم المقطوع= بأرضٍ خلاويه
يا ابو ثمان صف= واقرونها مردف
لو رد ما يلف= طيه على طيه
ملاكها ما يبيع= والقلب عيا يطيع
والدمع قام يضيع= عيني شقاويه
الشكر للمعبود =انه قريب جدود
ماني من اليهود = وانت سعوديه
ان ما عطونيها =والقلب هاويها
عيني تراعيها =والنفس مخفيه
وصف الغضي محدود= ما فيه نقص و زود
ما باقيٍ ياكود= تسليمها ليه
ان جابها الرزاق = لضعيّفٍ مشتاق
حرمت انا الاطلاق =ما دامها حيه
حلفت انا ما انساه = طول الدهر ما اجفاه
قلت آآآآه وا ويلاه =من هالبدويه
:::::::::::::::::::::::::::::::::::::::::::::::

اقطع اطول درب من اجلك ما احس بنفسي =إلا على خط الرجعه
ولما اصحو والقى حالي مش جالس جنبك=تنعكس الفرحه فجعه
احلم وانهض وامشي واصل واشكي لك = روحي منشلعه
واحكي واشكي وابكي مدري واطلع يا ويلك = ما اشعر بالطلعه
منامي واحلامي واوهامي طيله ايامي = ودمعه بعد دمعه
شتت افكاري واخباري بس الطواري = بقلبي مجتمعه
انا لو حبوني الناس ما احب الا انتي =نفسي مقتنعه
حبيتك من غير قياس زنتي او شنتي = ولِما ممتنعه
لوعه من نوعه مقطوعه وهي مشروعه = على حد السمعه
ثلاثه شمعات المحبه بكلمه مسموعه = وبميه شمعه

:::::::::::::::::::::::::::::::::::::::::::::::::: :::::::::::::





مرت سنين أرتجي=وأنتي تقولي لي ما أجي
الله يسهل مخرجي=راس السلامة مكسبي
أول تقولي لي هلا=ثم تجيبي لي البلا
لا لا لا لا لا لا=أنا ترى ماني غبي
عامين احاول نظراتك =ابغى استظل بخضراتك
اطلب وارجي حضراتك = وان صعب الله مطلبي
والله تأبى شهامتي = بعد ان اهنتي كرامتي
فلو تقوم قيامتي = برضي مابي مابي مابي
قلبٍ تهيض وانفعل= اقواه لو حتى اشتعل
لازم لازم اعمل زعل = واترك مثلي تتعبي
حتى تذوقي مثلنا = يجي اهلك ماجا اهلنا
وتصير حالك حالنا= ما تأكلي ما تشربي
لما تذوقين الجفاء = والبرد من بعد الدفاء
بها بها امل صفاء= بشرط ان تتأدبي
اطاعتك واعصايتك = جامعهم بهدايتك
ما مسكت عبايتك =او قلت وقف يا ظبي
نور من العين انطفا= ارجي من الله الشفا
لو توعديني بالوفا =برضي اخافك تكذبي
حقك على اللي وهقوك=قبلك كثير وفرقوك
اشقي وهمه ما شقوك = خلاص صلي على النبي
مسيرتك في بدايتك=كانك تعبتي نهايتك
خلاص بانت غايتك =عارف انك تلعبي
:::::::::::::::::::::::::::::::::::::::::::::::::: ::


روح وانا اروح يا خالي الفؤاد = روح يا راعي الجفا خلك بعيد
لا تقرب وانت في قلبك سواد = زيد في هجرك وانا ابا اهجر وازيد
انقطع حبل الموده والوداد= واستدل الكل بالراي العنيد
بشر الحساد بالهجر الوكاد= خلهم يدرون بكره يوم عيد
كل ليله في حكايات اجداد=ويستلمنا بعدها هجرٍ جديد
والصباح حكايات البارح تعاد= ما توافقنا على رايٍ رشيد
قد يكن خير لنا في هالبعاد= ربما انك تستفيد .. لو استفيد
او يكن لله في امره مراد = يفعل الله ما يشاء وما يريد
:::::::::::::::::::::::::::::::::::::::::::::::::: ::::::::::::::



صواريخٍ من العينين يرمي كل شخص اثنين = وتحرقنا بروح النار
سهرت الليل يا ويلي وانا قاعد على حيلي = وخايف صحتي تنهار
حرام تمر بالشارع وصدره بيّن وفارع = واهله ما عطونا انذار
فاحدٍ فر و احدٍ طاح و احدٍ مات و احٍد صاح= واحدٍ ضيع الافكار
من اولنا لآخرنا تحرولنا ولا سرنا= وصلبنا كما الاشجار
وكل حس بالجاري ومفعول الخطر ساري= وضاعت باقي الاخبار
تبددنا وشردنا وكل الناس تنشدنا = ولا احد يعرف اللي صار
لو انك شفت حالتنا وموقفنا وبغتتنا= من اصغار و وسط وكبار
بنفس الساعه اللي مر بها واطلق علينا الشر= وخلف بالجميع اضرار
صواريخٍ من العينين يرمي كل شخص اثنين = وتحرقنا بروح النار

:::::::::::::::::::::::::::::::::::::::::::::::::: ::::::::::::::::::::::


للعلم كل اغاني الفنان حجاب هو من كتبها ولم يخذها من الشاعر الاخرين

اخوك ابو محمد الكريباني







رد مع اقتباس
قديم 10-03-2009, 08:27 PM   رقم المشاركة : 3
معلومات العضو
نواف القريني
 
الصورة الرمزية نواف القريني
 

 

 
افتراضي

بسم الله الرحمن الرحيم

الله لايهينك يابو محمد انا كنت بنزل كل هالقصايد الي كتبتها بس سبقتني فيها
مشكور ولاهنت على مرورك الجميل


تحياتي لك
نواف القريني







رد مع اقتباس
قديم 11-03-2009, 12:38 AM   رقم المشاركة : 4
معلومات العضو
الغلا
 
الصورة الرمزية الغلا
 

 

 
مسابقة اختر الاجابة الصحيحة وسام مسابقة النحو 
مجموع الاوسمة: 2 (أكثر» ...)
إحصائية العضو







اخر مواضيعي

الغلا غير متصل


افتراضي

يعطيك العافيه

وطاب منقولك







التوقيع



انا اعتزل من كل شي (( بالنت )) الي اجل غير مساما............والله غفور رحيم

اذكروني بالخير..............
رد مع اقتباس
قديم 16-03-2009, 09:36 PM   رقم المشاركة : 5
معلومات العضو
اسير الماضي
 
الصورة الرمزية اسير الماضي
 

 

 
افتراضي

بيض اللهـ وجيهكم

على القصائد الرائعهـ







التوقيع

[align=center]

لاتزعل مهما تبعدنا الدروب وصرنا نترامى

بكل صوب راح نلتقي انا وانت
[/align




مشكووورة يالامبراطورة على التوقيع

رد مع اقتباس
قديم 17-03-2009, 08:55 AM   رقم المشاركة : 6
معلومات العضو
سعد مبارك المسحمي
 
الصورة الرمزية سعد مبارك المسحمي
 

 

 
مسابقة قروبات الفوائد - المركز الاول العضو المميز - مسابقة القروبات وسام اعلى نقاط التقييم 
مجموع الاوسمة: 5 (أكثر» ...)
إحصائية العضو








اخر مواضيعي

سعد مبارك المسحمي غير متصل


افتراضي

يعطيك العافيه اخوي نوااف على النبذه عن الشااعر والامير حجاب بن نحيت

واشكرك على الطرح الرااااقي

وتقبل مروري







التوقيع



Al_ms7mi

رد مع اقتباس
قديم 01-08-2010, 02:35 AM   رقم المشاركة : 7
معلومات العضو
ابن سماح
 
الصورة الرمزية ابن سماح
 

 

 
إحصائية العضو






اخر مواضيعي
 

ابن سماح غير متصل


افتراضي

حجاب بن نحيت

شاعرر وفنان سبق

يلومني بالحب ناسن ملقف.... الي محبتهم محبة هرافي


ياناس انا بحالي دارى واعرف .... وشعاد قلتم مابك الا العوافي


مشكرر على الموضووع


تحياتي

ابن سماح







رد مع اقتباس
قديم 01-08-2010, 06:02 AM   رقم المشاركة : 9
معلومات العضو
مزيد القعمري
 
الصورة الرمزية مزيد القعمري
 

 

 
افتراضي

.. نقل رائع للشـاعر والاميـر .. حجاب بن نحيت ..

.. وعسى الله يعطيكم العافيه على هـ المجهود الطيـّب ..

.. دمتو بـ خير ..







رد مع اقتباس
قديم 01-08-2010, 08:04 AM   رقم المشاركة : 10
معلومات العضو
لـمـعـة الـمـاس
 
الصورة الرمزية لـمـعـة الـمـاس
 

 

 
افتراضي

{ الله يعطيك العافية على النبذه و الاختيار الرائع ..

طلال العازمي شكراً على الاضافة ~







التوقيع







أحبـــج يآ بلآدي

Q8

رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 10 ( الأعضاء 0 والزوار 10)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
ديوان الشاعر الامير طلال الرشيد.. مهرة الظفير ملتقى دواوين شعراء من الخليج العربي 16 23-09-2011 09:28 PM
ديوان الشاعر عبدالله بن عون محمد العزران ملتقى دواوين شعراء من الخليج العربي 9 29-08-2009 12:07 AM
من سلسلة حجاب بن نحيت 2 نواف القريني ملتقى الشعر المنقول 3 17-03-2009 09:00 AM
اخر ماغنى حجاب بن نحيت نواف القريني ملتقى الشعر المنقول 1 13-03-2009 02:41 PM
من سلسة الشاعر حجاب بن نحيت 1 نواف القريني ملتقى الشعر المنقول 4 11-03-2009 10:34 PM


الساعة الآن 03:26 AM.


Powered by vBulletin® Version 3.8.5, Copyright ©2000 - 2014, Jelsoft Enterprises Ltd. Hosted By Beethost.net
(جميع ما يكتب في الملتقى الثقافي لأبناء قبيلة العوازم لا يعبر عن وجهة نظر ملتقى أبناء قبيلة العوازم بل يعبر عن وجهة نظر كاتبه )