عدد الضغطات  : 1784

سبحان الله وبحمده سبحان الله العظيم


   
 
العودة   الملتقى الثقافي لأبناء قبيلة العوازم > ( الملتقى الأدبي ) > ملتقى دواوين شعراء من الخليج العربي
 
   

ملتقى دواوين شعراء من الخليج العربي يختص بجمع قصائد الشعراء من الخليج العربي

إضافة رد
 
أدوات الموضوع إبحث في الموضوع انواع عرض الموضوع
قديم 15-10-2009, 01:55 AM   رقم المشاركة : 1
معلومات العضو
صقر
 
الصورة الرمزية صقر
 

 

 
Rating 5 ديوان الشاعر سداح


بسم الله الرحمن الرحيم

سداح العتيبي :

شاعر بكل ماتحمله الكلمه من معنى ,, رائع في كل قصائده ومبدع , يرفض الشهره والظهور الإعلامي والتي يتهافت عليها المستشعرين لأنه صاحب مبدىء ,, لن أطيل استمتعوا بهذا الديوان والحكم لكم :



ليّن جنـاب الـود يـا ليّـن العـود=وألطـف وأساليـب المحبّـه عديـده
خـل القسـا لاهـبّ تستاقـه النـود=وأحـذر بعـد مـا ساقتـه تستعيـده
بإسم الوفا والحب والطيـب والجـود=الصـح عيـده والخطـا لا تعـيـده
عليك حـلّ الحبـل والحبـل معقـود=تعقّـدت روس الحـبـال الجـويـده
وراك ساكت والسما بـروق ورعـود=والليـل موحـش والهبايـب شديـده
مدري حداك الصمت وأصبحت محدود=وألاّ أنّ صوتـك فيـه نبـره جديـده
تنقل كـلام شفـاك بعيونـك السـود=وفي كل نظره منك .. جملـه مفيـده
كم قلت لك مأمـون والسـدّ مسـدود=والشـك زايـل والهقـاوي بعـيـده
خوفي من اهل الرقص والنقص والزود=وبثّي يا إذاعه وأنشري يـا جريـده ‍
قلبي لهـد كبـدي وعبـرّت ملهـود=وأنته حجر قلبـك وكبـدك حديـده !
خليّتني ف الشعـر حـاوي ومـردود=وعلّقتني فـي بـاب بيـت القصيـده
وأزريت أغنّي فيك يا باشـة الخـود=مما بدالي .. مـا بقـا لـي شريـده
جوارحـي لرضـاك مقتادهـا قـود=تقـول حاكمنـي بشـرع وعقـيـده
لاشك حكم العشـق ماعنـه منشـود=وحكومـة العشّـاق ماهـي رشيـده
أنت اعتبر ما صار ماهوب مقصـود=وأنا أعتبر ما صار فرصه سعيـده.!



(( الريح ))

الريح هبّت يـا جنـاح الفراشـه=تمتّد وألأّ تكمشـك هبّـة الريـح
بين إمتداده طرقتـك وإنكماشـه=وروحك يسحبّها السحاب المراويح
من بارق الوسمي يسـدّك رشاشـه-=وبنت المطر تنثر لك الفلّ والشيـح
لا ذعذع الغربي تجيـك إنتعاشـه=وصفق الشمال يعرضّك للتباريـح
جالي وقارشك الزمـان إنقراشـه=جرحك كبر وأصبحت سيد المجاريح
تبكي وتشكي ظلم باشه ل باشـه=وأنا تضحكني .. دموع التماسيـح
سويّت لك مكتب ولجنـة إعاشـه=وجمعت رزقك من وجيه المشافيـح
الهم طاوي فوق صـدرك فراشـه=أسحب رشاك وفاخت البير ياميتح
ما ودّنا كسـر العظـام الهشاشـه=قدام نقطع دابرك حـاول تصيـح
اللي ظهر له صيت والطيب حاشـه=الزير سالم .. والعطاوي شليويـح
وألاّ أنت .. راسن ما ندوّر عراشه=تآقف على روس المراقيب وتطيـح
مجملّه .. مير أمرحـي يـا قماشـه=صحيح وضع الفن محتاج تصحيـح
المشكله ماهيب كرسـي وشاشـه=المشكله .. فاره ولوحـة مفاتيـح



(( انتخابات المجلس ))


وشلون أجي وأروح بسكات=أحيـان يزعجنـي سكوتـي
آخذ مع السجّـات سجّـات=ويقيسهـا متـري .. وفوتـي
وأليا وقفت لبـدع الأبيـات=أفـيـق وأغـنّـي بيـوتـي
وضع البلد وأبليس ما مـات=مابيـن عافـت و أمعفوتـي
كلّه .. مقّـرات إنتخابـات=عاده .. عساهـا مـا تموتـي
دوب أبتدت حرب الدعايات=معمـور بيـت العنكبـوتـي
دواير .. وكذب .. وشعارات=ومن يلحق الكـوره يشوتـي
(فرعيّـه ) وهيّـه وفزعـات=ولوحات ف الشـارع ثبوتـي
والعنصريّه ويـن مـا جـات=تلـوت راس الحـق لـوتـي
هذا يقيـم الصبـح نـدوات=وهـذاك يسـري بالكروتـي
أحدن يشيله ( حلف لابات )=وأحدن معـه طقّـة بلوتـي
عندي عليكم شاهد إثبـات=يا أهـل العمايـم والبشوتـي
الشيخ من كثـر الخلافـات=بالسـوط مبسـوط وشموتـي
يا مجلـس الأمّـه سلامـات=من سطـوة كبـار البخوتـي
الأوّلـه .. وحسابهـا فـات=والثانيـه بـكـره تفـوتـي
وأن زوّدوا في سوم الأصوات=في ذمتـي مـا ابيـع صوتـي
أخاف مـن ربّ السمـوات=اللي كفـل شربـي وقوتـي
و روس الشجر لو طال هيهات=مذموم .. والغصـن محتوتـي




(( احلام سوداا ))



يادافع الشعر لا تنسـاق مـن دونـي=مادمت في ذمتـي سـجّ القـدم فيّـه
خلكّ على نيّتي .. وظنونـك ظنونـي=وأنا ما أغيـرّ عليـك الظـنّ والنيّـه
البارحه مـرّت الأحـلام ب عيونـي=أحلام سودا ماهيـب أحـلام ورديّـه
تمرّدت وأستباحـت حرمـة جفونـي=وراحت على دربهـا عجلـه وطرقيّـه
أمسيت أصوّت لها وأصبحـت مغبونـي=وتفسيرهـا .. بيـن هاذيّـه وهاذيّـه
لو تستحي دمعتي من ضحكـة سنونـي=ماكان حطّـت بنـون العيـن ماريّـه
اللـي تناسيتهـم .. واللـي تناسونـي=بالخير مذكـوره .. وبالخيـر منسيّـه
والحبّ لا هزّ صدري حـرّك شجونـي=وحطبت حدب الضلوع ونارها حيّـه
أكثر جروحي سببهـا اللـي يحبوّنـي=وجرح الحبايب عطيـب وكيّتـه كيّـه
تبكي على راسي وتضحك على متونـي=نفضت خرجي وطاح الـداب والحيّـه
وين أنت يا اللي عليك أكوسر لحونـي=هيجنت ب إسمك وشلت أغلى هجينيّه
يوم أنت هجسي وحدسي وأصدق فنوني=من لامني فـي غرامـك لعنبـو حيّـه
شطيّت بي في هـواك وزادت شطونـي=مع لاهب الشوق بين الشمـس والفيّـه
وعلمتني كيف أغيـرّ شكلـي ولونـي=وأعيش جـوّ .. الحكايـات الغراميّـه
يا سيّد الحب .. معك الحـب مامونـي=وأنـا علـى جرّتـك عينـي شقاويّـه
مجبور لا شفتني .. ماشي علـى هونـي=حاولت وأزريت لا أكسر قيد رجليّـه





(( جده غير ))


يامسافره مع جناح الطيـر=حسبي على الطير من هـدّه
ضفّك جناحه وعيـنّ خيـر=وحبـال الأشـواق ممتـدّه
يابنت .. ما للسفـر تبريـر=خصّن ليـا طالـت المـدّه
انتي تقوليـن جـدّه غيـر=وانتي بعد غير عـن جـدّه
جيتي بحرها وجـاك مغيـر=مشتال موجه علـى يـدّه
المـوج ودّه يضمّـك ميـر=الـبـحـر . ودّه ولا ودّه
يانفحـة الشيـح والنويّـر=سداح بـاح الجفـا سـدّه
وش خانة الشعـر والتعبيـر=أبني لـك البيـت وأهـدّه
دايم وطيفك ضحى واعصير=يشـنّ هجمـات مرتـدّه
واليا عرض لي عكست السير=ومسحت خدّي على خـدّه
الياس يقضى على التفكيـر=وافزع ورا الصبر وارتـدّه
وانادي الحلـم لـالتفسيـر=ولازلت .. ولا زالت الشدّه
من يوم كنتي وكنت صغيـر=نضحك على العمر ونعـدّه
واليا حصل بيننـا تقصيـر=نصدّ .. ولا تبطي الصـدّه
لين ابتدا الشيب والتوقيـر=وعلاقتـي معـك مشتـدّه
محبّه .. وحشمه .. وتقديـر=وانفاس واحساس من قـدّه
منتي على موجـة التغييـر=يابنـت الأجـواد محتـدّه
لقياك مـا تقبـل التأخيـر=خصّن بعد طالـت المـدّه
وانتي تقوليـن جـدّه غيـر=وانتي بعد غير عـن جـدّه





(( وقف علي رمشي ))



لايابعد من سأل عـن آخـر نتاجـي=الشعر يفداك والشاعـر .. وجمهـوره
لازلت عايش على طبعـي ومنهاجـي=اليا حضر هاجسي غنيّت ل حضـوره
ياتاج راسي لا والله راسـي وتاجـي=محبّتك في ضلـوع الصـدر محفـوره
من غيرك اللي تعـلاّ برجـي لعاجـي=ووايق على رجم قلبي واسبل شعـوره
برجن تعليّت به .. من بـدّ لإبراجـي=واخذت يوم استويـت بقمّتـه دوره
بنات فكري وراك افـراد وازواجـي=تدور مسـروره .. وتطيـح مقهـوره
عرضتني ل الهـوى ماعـاد يحتاجـي=وهزيّت غصن الغرام وطارت طيـوره
ودخّلتني جوّك .. وضيّعـت مخراجـي=وجوارحي معك .. منهيّـه ومامـوره
بابور بحري عليـك يسابـق امواجـي=وامواج بحري عليك تسـوق بابـوره
اهديت لك راحتك واهديت لي ازعاجي=معذور .. وظروفنا ماهيـب معـذروه
لا تنبش الخافيه .. منعاً ل الإحراجـي=خواطر اهل الهوى خجلا ومكسـوره
متى تفـك القيـود وتعلـن افراجـي=الشيب يزهم علـيّ ويرسـل سبـوره
وقّف على رمشي وسولف مع حجاجي=وانقل عليك الغلا .. بالصوت والصوره





(( غبت كلي ))




أعذروني عـن غيـاب ٍ زلّتـه مدموحـه=وأسمحوا لي لين أراجـع سيرتـي وسجلّـي
غبت كلـيّ والدوافـع كلّهـا مشروحـه=أفتحوا كشف الحضور وسجلّونـي كلّـي
هكذا طعـم المحبّـه .. حلـوه ومملوحـه=وهكذا الفرقا مملّـه .. والوصـال مسلّـي
العلم مرفوع يـا اللـي ترفعـون اللوحـه=الشحيـح يصـدّ عنـيّ والكريـم يهلّـي
دام باقي فـي ضميـري نافـذه مفتوحـه=عبرها ينفـذ شعـوري ليـن يبـرد غلّـي
قلبي المجـروح مـدري كبـدي المجروحـه=جرّ عمرك يا النسم بيـن الضلـوع وقلّـي
دمعتي تبحث خفاي وضحكتـي مذبوحـه=هيّنـه والصبـر طبعـي والقناعـه دلّـي
ما بقا للشعر واهـس والهجـوس تشوحـه=بين منقود الرفيق وبيـن شرهـة خلّـي !
أنقرض نسل القصيد وراح راحـت روحـه=وأكثـر الشعّـار ولّـت والزمـان مولّـي
أنتكس حاله وحـال الساحـه المسيوحـه=الحصن تضبط وتربـط والكديـش تفلّـي
يا معيـن الصايبـه والمخطيـه مسموحـه=قام يمشي مع رصيف الشمس..راكب الليّ !
جاك وقـت الـذرّه المفتـرّه الدرموحـه=عقب باد ( المارتين ) وبادت ( العصملّـي )
يفزع الطحطوح وألاّ تفـزع الطحطوحـه=الدعـاوي حطّهـا وأشتالـهـا بامجـلّـي
كيف صدّرت الفتاوي يـا بناخـي توحـه=وأنت لا تعرف تصوم ولا تعرف تصلّـي ؟
كلّ ما هبّ النسيـم أستنزلـت منفوحـه=والعليّـا يـا ماشـاء الله حظّهـا متعلّـي
القضيّـه بيـن شمطـان اللحـا مطروحـه=ينقطع حبـل النفـاق وعقدتـه تنحلّـي
طاوله وأربع كراسي وأمسيـه وأصبوحـه=والله الله .. مير حلّي يـا حـلاوه حلّـي




(( تحت الحزام ))




يا حبيبٍ صـد مافيهـا كـلام=تلّ كبـدي وأنقطـع معلوقهـا
قـام يفلقهـا وخلاّهـا حطـام=قلت ليه ؟ وقـال عـدّ فلوقهـا
يوم جاء في نيّتـه نقطـة نظـام=طيـرّ طيـور الجفـا بسبوقهـا
عقب كنّا فـي محبّـه وانسجـام=نقطف ثمـار الهـوى ونذوقهـا
ذعذع الهجر ونشى مزن الخصـام=وقامت الفرقـا تلـوح بروقهـا
ما يعزيني سـوى نـوح الحمـام=شلت طاروقي علـى طاروقهـا
وش حصلّك وانت لك قدر ومقام=لهجتـك مـا ينفهـم منطوقهـا
ليه تذبحني وأنـا ذبحـي حـرام=ماتضيـع عهـودي ولا أبوقهـا
أذكر أني يـوم زاد بـك الهيـام=قلت لك سوق المشاعر سوقهـا
مايفيد الرمي من تحـت الحـزام=أرم .. من حدب الضلوع وفوقها
صابرن والطقّ ما فـكّ اللحـام=والليالـي شرّهـا بـحلوقـهـا
صار في شخصيتي شبه انفصـام=رحت اطشّ السالفـه واحوقهـا
أكثر العشاق فـي سلـم الغـرام=يفتـح الله ضايعـات حقوقهـا
خاتمك بالمسك يا مسك الختـام=طبت يا شفّ الجـروح وذوقهـا
كان عذرك مانـي بقـد المقـام=الخطايـا .. قافلـن صندوقهـا
لكن اصبر لين ابلّغـك السـلام=من عيونن شالتـك فـي موقهـا
العيون اللـي تحبّـك بـانتظـام=كل بادي ليـل ترسـل شوقهـا





(( جورج قرداحي ))

تكفا طلبتك طلب يا جورج قرداحـي=مع كـلّ حلقـه تسجلّهـا تنادينـي
أزهمني اطير لـك واسابـق جناحـي=والله لـه المنّـه .. ولحـدن يودينـي
(الأرض يمشي بها المجنون والصاحـي)=قافن .. ودايـم تغنـيّ بـه جناحينـي
أبنفض الريش والبـس للهوا وشاحـي=والشمس لا غمضّت ما غمضّت عينـي
في ظرف خمسة دقايق تسمـع فياحـي=وصلت سالـم عسـا ربـي يعافينـي
قل مرحبا ياهـلا بالشيـخ سداحـي=واقـول دام البـقـا والله يحييـنـي
مستنكر اصراري ومستغرب الحاحـي=ابكسر الحاجـز اللـي بينـك وبينـي
هوايتـي قفلّـت .. بابـي بمفتاحـي=وطموحـي ارد دمـي فـي شرايينـي
مغير اجر اللحـن واومـي بمسباحـي=دخّلنـي أمسابقـتـك ولا تخليـنـي
أسأل وأنا أجاوبك واثـق ومرتاحـي=وفي ذمّتـك لا تغـش ولا تخاشينـي
ما ابغا اختيارات ولا جمهور صداحـي=يكفيني اصدح لحالي وانـت توحينـي
ولا تتصل في مناحي سافـر مناحـي=ولا فيه غيره يعرف الجيـم والسينـي
دايـم جوابـي نهائـي لاح ياملاحـي=مقرود خلقه والاحـي مـن يلاحينـي
بالك تفلسف عليّ وتنبـش اجراحـي=قل صح ولا خطـا والحـظ يرضينـي
ياثقل دمـك ليـا عـودّت مزاحـي=لبنانـي المرجـع ودمّـك فلسطينـي
مليونك اب شنطتك وكفوفك شحاحي=وانـا ديـونـي تـعـدّن الملاييـنـي
وان كان مال النصيب وحظّها طاحـي=ماقلت لك عطني ولا ابغـاك تعطينـي
اسمع صحيح النبا ياجـورج قرداحـي=ان كان ما اغنانـي الله منـت مغنينـي








(( نسايم ليل ))



يا شعرنا الموروث طالبك السمـاح=عني وعـن شعّـار جيلـي كلّهـا
ماني وكيل الورث وأفلح يا فـلاح=لا شك قسمي فـالرعيّـه جلّهـا
حنّـا عيـال العولمـه والإنفتـاح=وأنته علومـك خلّهـا فـي حلّهـا
الفلك داير من صباح إليـا صبـاح=حلّت عليـك اللـي تبـا تحتلّهـا
ماهوب لازم نآآرد العـد القـراح=كثرت مواردنـا ولا تفطـن لهـاا
العام في ظل الشجر والـورق نـاح=واليوم تكفينـا القصـور وظلّهـا
تصبح ونضرب بك على الحزم البراح=وتمسي خـلاوي والدمـوع تهلّهـا
مير أقتنع بالحـال واللـي راح راح=ريّح ضميـرك والحواجـب فلّهـا
يا ملقّحين الحيل .. ولـدنّ اللقـاح=تقاسموهـا .. لا تمـوت بغلّـهـا
هبّت نسايم ليل من مبسـم نجـاح=ياليـل بلغّهـا السـلام وقلّـهـا
(جمهور الأستديو ) على خفّ وجناح=وإليـا تثنّـى عـودهـا طبلّـهـا
والناقد المنقـود سـاق الإقتـراح=وضيوفهـا نضحـك لهـا ونملّهـا
رزّت علمها باشـة الغيـد المـلاح=أصبر عليهـا والسيـوف تسلّهـا
المجتهـد عيّـا يحالفـه النـجـاح=أظن سـاس المشكلـه فـي حلّهـا
المصلح الله كان تبغـون الصـلاح=والله يخلـي لـالخليلـه خلّـهـا
اقرب مثل يلبق على مبسـم نجـاح=اللـي عقـد روس الحبـال يحلّهـا






(( اصفر العرقوب ))


أنطلق يا اللي تحـب الإنطلاقـه=البرا مـردود والطرقـه قصيـره
لو لحمك جلال واعظامك دقاقه=ألحق الأولى وتلحقـك الأخيـره
ومثلك اليا حط رجله شال ساقه=وقام يصلب عظم ساقه في مسيره
أصفر العرقوب لعلومـه لحاقـه=ليه نكسر خاطر الساق الكسيره
سقت له خيري وخيره وين ساقه=كثرّ الله بيننا .. خيري وخيـره
يا صديقي عاد .. لاعادت صداقه=ما نحبّ من الوجيه ألاّ السفيـره
ميّزك ربي عـن وجيـه الرفاقـه=وجهك مربّع .. وعينك مستديره
لا تراودني على قطـع العلاقـه=ثايرن دميّ وسيفي فـي جفيـره
كل ما مريّت لك مبـراك ناقـه=تنشد الجمّال عن مبـرك بعيـره
من يشيل الحمل ويشيل الوساقـه=صرّ عينك وأرخ سمعك مع هديره
استحي من تالي أسمك فـالبطاقه=وأنقل الشرهه على شيخ العشيره
الله أنّه لا يعوقك وأنـت عاقـه=خلقه مفتّح بصر وأعمى بصيـره
ما تسولف غير من باب الحماقـه=هكذا الأحمق يعبرّ عـن ضميـره
طال راسك وأبشر بموس الحلاقه=من نوينا نقلعـه مـا نستشيـره
أنت واللي قادها قطّـاع ساقـه=شلة ٍ ترقص على نفس الوتيـره
مير باقي من ذبال الـورد باقـه==اأعرضوها في تلفـزون الجزيـره






(( عبدالباري ))


أسمع خبـر عاجـل ودوّر غيـره=سلّة قنوات الفضـاء .. مليانـه
خل الريموت الله لا يكثـر خيـره=يطوي لك الشاشات حسب إمكانه
وأنته معه .. فـي لفّـه وتدويـره=وتشوف حكمة خالقك سبحانـه
هاذي مع العجّه تجيـك أمغيـره=وهاذيك مع صفق الهوى بلشانـه
اللّه يدمّـر .. شاشـة الجزيـره=مشبوهه .. ومنبوذه .. وخوّانـه
تبغى لها حسن سلـوك وسيـره=دايـم قمرهـا ثابتـن مكـانـه
فيها المذيـع يصفّـر أبـصفيّـره=وما للعلوم اللي سردهـا خانـه
يمسي بعلمـه والشهـود تديـره=ويصبح ويثبـت زيفـه وبطلانـه
ويلمس شعور المستمـع ويثيـره=ويعـدّ علمـن ضايعـن برهانـه
وشعب العرب أدنى ما طيرّ طيـره=وأليا كفخ .. تكسرّت جنحانـه
على الدعايـه يشعمـون النيـره=وبلدانهـم مسلوبـه ومنهـانـه
يا الشرذمه .. يا الزمره الشريـره=لقايـط التشريـد مـن ميدانـه
قولوا ل(بن عطوان) ينفخ كيـره=ويرقص لشعلة عـوده ودخانـه
ماهوب عبدالباري .. عبد الليـره=عميل مستآجـر كـلام لسانـه
مشرّد وشارد عن أهـل الديـره=ما ينومن لا رحـم أبـو جدانـه
يهزّ راسه فـوق كـاس البيـره=يرفع شعار القدس ويرخي شانـه
عبرّ بحقـده .. وأنتهـى تعبيـره=وعـوّد علـى تجريحـه وبهتانـه
يـا خاينيـن المعرفـه والجـيـره=كلّـن علينـا ينغـزه شيطانـه
يا جعلكم من جرف في دحديـره=وان طاح سقف البيت من عمدانه
نعـوذ بالله .. مـا نعـوذ بغيـره=يسبّنـا اللـي قاصـرات أيمانـه







(( ملامة اصحابه ))


الشرهه اللي تعـدل العـذر ويميـل=مالت .. وعذر المخطيه مـا عدلهـا
واللي شرب من (ماء وجيه) المشاكيل=ملامـة اصحابـه شربهـا واكلهـا
السالفه راحـت حقـوق ومعاديـل=يا اللي تزم بكلمـة الحـق قلهـااا
مادامهـا شاشـه بطولـه وتمثيـل=مافيـه غيـرك يـا بطلهـا بطلهـا
يقول انا الأستـاذ ومـدرس الجيـل=واضيعة الأجيـال وخيبـة أملهـا
قامت تخلخـل فوقـه ام الخلاخيـل=تمسح على النحله وتلحس عسلهـا
دايم معه مطـرق وبنـدق ودربيـل=ويقـصّ درب الغافلـه وأيختلهـاااا
ضيّع حلاله بيـن زهـران وهذيـل=وأمسـى يفـك اعقالهـا ويعقلهـا
ضيقتنـي بالحيـل يابـارد الحـيـل=واللي يجيك امن العلـوم احتملهـا
( لطّامة العايـل وذباّحـة الحيـل )=ما سرّحت مع ذودهـا الاّ فحلهـا
مادمت ما تقدر على الحط والشيـل=لا تعترض بيـن الحمـول وجملهـا
أفرد لسانك مع هل القـال والقيـل=وأجمع حـروف السالفـه وارتجلهـا
بطنك بطن عقرب وظهرك ظهر فيل=واتّقـدم الوحـده وتآخـذ دبلهـا
قدّام لا تضحك عليـك الرياجيـل=خـل العلـوم الهابطـه وأعتزلـهـا
قال المثل هجيّ يا شقرا مـع الخيـل=وهذا المثل لا يق لك ولا يـق إلهـا





((الهجوم المفاجئ ))



يا اللي ترد العلـم وتـرزّ الأعـلام=سولف وأمانـه لا تعكـرّ مزاجـي
قليّ علامك ليـه وأقـول منضـام=والضيم علّه مـا نفعهـا العلاجـي
تقول لاجمنـي عـن علومـي لجـام=ومن عقدة لسانـي تعقّـد حجاجـي
تجمّعت في صدري وراحـت أقسـام=وأزريت أمدّ الشوف وأعرف خراجي
مغير أغنـيّ مـع ذعاذيـع الأنسـام=وأعلن على صفق الهبوب إحتجاجـي
شاعر ولا أدري كيف حطمّت الأرقام=ومعناي في بعض البيوت إزدواجـي
ثبتّ تاجي فوق راسـي مـن العـام=وأخاف أهزّ الراس .. ويطيح تاجـي
آخذ من أحداث الزمن مصدر إلهـام=مرجوج .. وأحداثه تزيـد إرتجاجـي
وكسبت معلومه علـى مـرّ الأيـام=بيـن السياسـه والنجاسـه تناجـي
يزمر علينا بـوش ويصيـح صـدام=يا الله تكافـي شرهـم يـا مناجـي
لعبه خبيثه .. مالها شـرع وأحكـام=تضيق منهـا واسعـات الفجاجـي
مصالحـن مابيـن بايـع وســوام=منتوجها جلب العـرب للحراجـي
صفارة إنذار .. وطـواري وكمـاّم=وخطّه لـتطويق البلـد بـالملاجـي
نصب حقل النفط في حقـل الإلغـام=ونفتح منافذ فـالشريـط السياجـي
ونمشي خلاف ونظرة العيـن قـدام=من خوف يلحقنا الهجـوم المفاجـي
ونستورد من الهند والسنـد خـدام=ومن العراقييـن .. مليـون لاجـي
وبكره تبثّ العلم شاشات الأعـلام=طار الحمام .. وبيضّـن الدجاجـي







(( تركيبة انفاسي ))



عرّضت صدري لـالهوا عسا تناهيتـي تطيـر=ملّت تحايلني .. وأنا مليّـت أحايـل كبتهـا
هاذي ثلاث شهور كابتها وصارت ما يصيـر=الى متى تزرع وتحصد فـي ضلوعـي نبتهـا
مابه زفير إبلا شهيق ولا شهيـق إبـلا زفيـر=تركيبة أنفاسي كـذا .. خلقـه ولا ركّبتهـا
آقف على جرّ النسم وامشي على سلك الحرير=واقص درب الذاهبه وان جابهـا الله جبتهـا
مالي صحيب ولا نديم الاّ العنا .. فقط لاغيـر=واللي تلوّت فـي حبـال المعرفـه حاربتهـا
والعبره اللي سقتهـا وعيّـا يعبرّهـا النظيـر=دحدرتها مع مسلك البلعـوم ليـن أنشبتهـا
وعقارب الساعه على ذبحي تلـفّ وتستديـر=وأيامي الغبرا قهر .. مـن سبتهـا لا سبتهـا
واليا ضواني ليل ذقت الويل فـالثلث الأخيـر=أرقب نجومه وأن بدت شمس الضحى راقبتهـا
اورّد التوبه .. ليا صدّرت تأنيـب الضميـر=وأكثـر ذنوبـي لا تتوبـنـي ولا توبّتـهـا
واطوّل المحراف واردّه على اللحـن القصيـر=وأنا هناديبـي علـى مـدّ النظـر هندبتهـا
وأدوّر الخيره .. وأنا خيرّ ولا عيّنـت خيـر=مصلاح وأسعى في صلاح ظنونـي وخربّتهـا
الحال مقطوع الرجا .. والهمّ منقطع النظيـر=ياربّ نفسـي لا تعذبّهـا .. بعـد عاقبتهـا
يارب لا تجعلني ( الأشقى) موالـف زمهريـر=والطيبّه ما أخطيتها .. والخيبّـه مـا صبتهـا
الخاطر المكسور لا يضحك على العظم الكسير=العظم يجبر والخواطـر سايبـه .. لا سبتهـا
لكن يا الرب الغني .. يلوذ بك عبد(ن) فقيـر=عساك ترحم نفسه وتلطـف ليـا حاسبتهـا







(( البيرق المنكسر ))



مافيه داعي تهلّ الدمـع مـن شانـي=بكره يقولـون ليـه الحـبّ بكيّتـه
أنـا تمنيّـت تذكـرنـي وتنسـانـي=وأنته يـا ليتـك تمنـىّ اللـي تمنيّتـه
رسايلك جات .. بين أسمي وعنوانـي=وتعلّقـت بيـن .. ضيّعتـه ودليّتـه
بعض البشر لو يدوّرنـي مـا يلقانـي=وبعض البشر لو يجاذب سيرتـي جيتـه
لا تنشغل خلّنـي يـا سيـد خلانـي=استسمحك وقتي اللي معـك مضيّتـه
قل فارس الحلم .. خليّتـه وخلانـي=أو قول بالعكس .. خلانـي وخليّتـه
ياسيفي ودرعـي وخيلـي وميدانـي=البيـرق المنكسـر لرضـاك رزيّتـه
أموت من ضيقتـي ميـر الله أحيانـي=وجوارحي نـوب لا حيّـه ولا ميتـه
رغم اني اعاني من الوقت مـا اعانـي=مسحت صبري على جرحي وداويتـه
يا اللي تبيها سوى وصلي وهجرانـي=الأوّلـه زلّهـا .. والثانـيـه ليـتـه
فرشت لك قلبي وشلتك في وجدانـي=وأرتحت في قلبـي المفـروش وأذيّتـه
في ذمتك لا تراودنـي علـى أجنانـي=وصلـت حـدّ الجنـان ولا تعديّتـه
وان قلت وشجاك مدري منك وشجاني=مغير مديّـت لـك كفـيّ وعضيّتـه
ماعاد مع راسـي الا روس جنحانـي=والريح لاهبّ مـع طاريـك هبيّتـه
اسمح لي اجرّ صوتي واسحـب الحانـي=والشعر .. لا ضقت غنّانـي وغنيّتـه
العام انا .. مبتلش في عقـدة السانـي=واليوم انا .. شاعرن ما ينهـدم بيتـه








(( هذي وذيك ))



الله يشتت شملكـم يـا الصعاليـك=يـا البالشيـن المبلشيـن المـواذي
بالحقد والغيره وعقـد الشرابيـك=صفوّا ( حذا ) على الطريق المحاذي
يا اللي تراهنتوا على بيضة الديـك=حمر الطواقي فوق روس الشـواذي
رعّادكم عادي .. وبرقـه تماتيـك=ولا أدري مطركم سيل وألاّ رذاذي
النور ما يحجب ولا فيـه تشكيـك=لاشكّ غاذيكم من الشـرّ غـاذي
ياقافل البيبان .. فـكّ الشبابيـك=يمكن ينوشك من شذا الورد شاذي
الفرق شاسع بين هـاذي وهاذيـك=يا اللي على هاذيك فازع بهـاذي ؟
هاذيك ماشاء الله بعيـدة مداريـك=وهاذي معـاذ الله ونعـم المعـاذي
قامت على الطاير وطاحت دبل كيك=يوم الحكـم بيـن الجماهيـر لاذي
كلمة وفا ماهيـب شبيّـك لبيّـك=يـا شلـة ٍ يـا جعلهـا للنفـاذي
متكتكـه ماعـاد تحتـاج تكتيـك=كلّ ٍ يدّور عـن رفيقـه مـلاذي






((داعي الاحساس ))



يوم أهوجس كل ليله وأغنيّ كـل يـوم=ودّي أعتق بنت فكري وأفـكّ وثاقهـا
وأتقـدّم للقصيـده وأنـا مالـي لـزوم=غير أجبرّ ساقهـا المنكسـر وأستاقهـا
الله اقوى صرت وانا والهجوس أخوان توم=ما تحـب فراقـي ولا هويـت فراقهـا
شاب رمش القاف والشعر مندوب الهموم=داعي الإحساس والناس حسب أذواقهـا
حضرته دايم حضوره مخصـصّ للعمـوم=الجماهيـر الغفيـره يـهـزّ أشواقـهـا
قال في راسك خبر قلت في صدري علوم=وأنته اللي بين راسي وصـدري حاقهـا
وعوّدت خذها وذقها وستـر الله يـدوم=وقبل يأخذهـا نديـم القريحـه ذاقهـا
الله يجيـب المطـر لا تلفـتّ فالغيـوم=المخيلـه مرّتـك وابتـسـم براقـهـا
علّمتنا العولمه .. دوت نت و دوت كوم=والليالـي علّقتنـا عـلـى معلاقـهـا
آه يا كثر الطواري علـى بالـي تحـوم=والعيـون المستديـره تـدور أحداقهـا
لو تجيني ساريـه مـن مرابيـع النجـوم=قمت أدقّ إجلالهـا والتـوي بدقاقهـا
هكذا حال الشقي لا يطيـح ولا يقـوم=ولو حظوظه طبّقـت شالهـا بأطباقهـا
ماني بمذنب ولاني من الذنـب أمعصـوم=مير خزنة خاطري باقهـا اللـي باقهـا
العوايد من نتـاج المذاهـب والسلـوم=والخلايـق يختلـف خلقهـا وأخلاقهـا
لو تروح القوم صدقان والصدقان قـوم=الصداقه مـا تعلّمـت خلـط أوراقهـا
أضحك وكبدي عليها مثل ضرب السهوم=والنفـوس القانعـه سرّهـا بأعماقـهـا
ما غـدا بحلومـي ألاّ مفسـرّة الحلـوم=كل بادي صبـح مـا ينومـن ميثاقهـا
ما رجينا حاجة ٍ من ورا حـبّ الخشـوم=خذ كبـار الـروس بالمـوس ياحلاّقهـا







(( البابا ))

يا موّزع الصحف وقّف لا تعدّاني=لاهنت عطني من اللي معك مطويّه
بحساب ما نقبل التوزيع مجاني=شكرك على المطبعه لا تنقله ليّه
عطني لو أن الجريده حسب ماجاني=أوراقها ميّته .. وأخبارها حيّه
تقول فيها الخبر حصري علشاني=تثير في صدري أنواع العصبيّه !
لا قلت هاد الخفوق وقرّ ميزاني=جتني بخشم الفتيل و ولّعت فيّه
ترمش عيوني على شعله ودخاني=دخان في هاذي .. وشعله في هاذيّه
يا طول بالي على ما حسّ وجداني=والحسّ لولاه ما أعرف الحساسيّه
ماغير أحايل ضميري قدر الإمكاني=ومواكب الهم خيّاله ورجليّه
يا اللي تنادون بإسم حقوق الإنساني=وين إحترام الديانات السماويّه ؟
اللي يثير الضغينه بين الأدياني=بكره يصوّت على الحرب الصليبيّه
عليك سبعين لعنه يا الفاتيكاني=يا جعل راسك تفنتك فوقه الحيّه
حقود والحقد فيك أشكال وألواني=نصراني الدين والملّه يهوديّه
نازي ومتعنصر وملحد وشيطاني=وكنايسك عمّروها بالحزازيّه
تقرا على الغانيه وتحضّر الجاني=وتصوّر القسّ بين الشمس والفيّه
نبيّنا أطهر بشر .. يا المفتي الجاني=منصور برعاية اللي يدمح السيّه
رسول ورسالته من وحي رحماني=زاح الظلام وبعث للخلق ماويّه
ما يلحقه زيف ولا يقفاه بهتاني=سيد البشر كلّها ما ينخلق زيّه
صلى الله وسلّم وبارك بالإحساني=عليه لا حلّ بين الناس طاريّه
عن سيرة ٍ ثابته مع مرّ الأزماني=تخسى يا بابا المسيحي والمسيحيّه
شريعته واضحه .. سنّه وقرآني=ماهي خيالات وأطباق ٍ خرافيّه
الله يسلّط على البابات من داني=لا بوه بابا على ابو منهو أوبيّه


!






(( راحة البال ))


ياحزّة الضيق .. صدري منك ما ضاقي=لقيت معك العلاج وهانت العلّه
إليا رميتي بدلوك داخل أعماقي=قريت لك ما تيسّر من كتاب الله
أطوي حبالك وأنا واقف على ساقي=عليك راسي طويل ولا قصر ظلّه
كم راح من ضيقه .. وكم من حزن باقي=جردت كشف الهموم وجات منسلّه
وأنا لوّ أنيّ زعلت وشانت أخلاقي=لازلت من فضل ربيّ من هل الملّه
مخلوق قانع وراضي بأمر خلاّقي=مثلت لأمره وانا خاضع من الذلّه
بكيت يوم المدامع تحرق إحراقي=لكنّ هانت بعد جفّ البكاء كلّه
أخاف من يوم تشخص فيه الأحداقي=وتميل بي كفّة التقصير والزلّه
ياربّ عفوك وأنا للعفو توّاقي=كم لي وقلبي يفوح ولا برد غلّه
لو راحة البال تعرض وسط الأسواقي=ما كان نص الخلايق صابها خلّه
والشعر من يوم ماخربنّ الأذواقي=ماهوب في حلّي ولانيب في حلّه
ما غير أغنيّه لو ما حرّك أشواقي=قريحتي من ثلاث شهور منشلّه
أدرّج السانيه .. وأعدّل الساقي=واللي سقا السنبله عيّت تسنبلّه !
ما حنّ رعاّدي ولا لاح براّقي=إلاّ بعد راحت اليبّاس مبتلّه
لكن عسى ساحته بألفين طقاّقي=هذاك صفقّ له .. وهذاك طبلّه
غش ومجامل وزيف وكذب ونفاقي=جات لوجيه البشر ماهي لوجه الله
ومسابقات القصايد طاق طرباقي=طربق على الشاعر الموهوب وأرسلّ له
فالليل طارت ما بين دشوش وأطباقي=والصبح طاحت على البراّد والدلّه
وعن سلّة البيض يدري كلّ سلاّقي=وكلٍ تحيزم لسلق البيض فالسلّه
مابين شعر الحدث وعيون عشّاقي=مشكور يا اللي تعقد الحبل وتحلّه
( خلاص ماعاد فيها قدس وعراقي )=قبل إحتلال العراق القدس محتلّه
مدري متى نجتمع فالمنزل الراقي=بعد أفترق جمعنا كثره مثل قلّه
اللي بقا من زهابي موس حلاّقي=نفضت خرجي و وزّعته على الشلّه
من يرفع أقلامي ليا جفّت أوراقي=أخاف لا أموت والأقلام منصلّه !









(( نجاح ومعمر القذافي ))



( البقا لك يا زعيم الثوره الليبيّه )=يا المهيب المستهيب الوافي المستافي
أبدعت بنت الحلال وصاغت القافيّه =وأبتسم حضرة جناب معمّر القذافي
سلهمت والعين فيها خلطة ٍ سريّه =بين رمش ٍ مستفيق وبين رمش ٍ غافي
يا ماشاء الله يا نجاح الساحه الشعبيّه =تمدحين وترزحين ولا عليك إخلافي
والقصيده لو نقول بيوتها قطيّه =كثرّ الله خير قوم ٍ يبدعون القافي !
راسك المعصوب والدرّاعه العاريّه =هكذا ما تقتضيه المصلحه يا كافي
تجمعين من الخليج العمله النقديّه =دوّري لك ف المحيط الأطلسي صرافي
قدّمي ( دانات ) وأنتي ف البحر حوريّه =وكل دانه من يدينك لونها شفافي
كبّروك وصوّروك بمحزم وجنبيّه =وأستلمتي ورث أبونا والسنين عجافي
ما بقا الا تعتزين وتنطحين الهيّه =كل بادي ليل رجلك تبدي المشرافي
لو ما حققتي جميع أحلامك الورديّه =الوكاد أنك سنافيّه وبنت سنافي
الله الله .. واحليل الشاشه الفضيّه =ما بقا في عرضها شي ٍ علينا خافي
يا معمرّ من يضيفك .. ضافته جنيّه =والله أنك لا تضيف ونقص ماتنضافي
لعنبو شعر ٍ تعرفه يا زقيم الحيّه =الأديب اللي سواتك منطقه ينعافي
من كبر راسك ما تلبس غتره وطاقيّه =تنفض الشوشه وحظّك طيّب ومتعافي
تحكم الشعب المعنّا بين شمس وفيّه =وتحسب أنك ف المواقف تحكم الميقافي
من ثلاث عقود حسب السيره الذاتيّه =بارد ٍ وجهك ورابض ف المراح الدافي
يا الله أنّك لا تسجلّها عليّه سيّه =مير مدري كيف يحكم كاهن وعرّافي ؟
لا قضيتي من زعيم الثوره الليبيّه =أستضيفي يا نجاح .. محمد الصحّافي




(( فيض المحبين ))


من ليلة البارح وحابسني الضيق=عسى صباح اليوم يطلق سراحي
وعادت لي الضيقه على فكّة الريق=الله يهوّنها ويسعد صباحي
لا قمت أدرّجها على قد ما اطيق=تغانمتني من جميع النواحي
بيني وبين الغرغره والتشاهيق=أرماش عين وجلسة ٍ وإنسداحي
لاشك يومي عند رب المخاليق=اللي بذكره بهجتي وإنشراحي
مانيب وارث غاليات الصناديق=وخزاين آل سعود وآل الصباحي !
أن عشت .. عشت مع الرجال المطاليق=وأن مت .. موتي حق والعمر ماحي
هبت هموم الصدر جمله وتفريق=وأزريت أعرّضها هبوب الرياحي
ما عذّب الشعّار غير الطواريق=كل ٍ تعلّق فوق قرن الوضاحي
موّثقه ماعاد تحتاج توثيق=وانا قنعت وخاطري ما استراحي
وشاح خملوقه .. على أم الخماليق=اللي تشوفونه عليّه وشاحي !
أغيب من فيض المحبيّن وافيق=وآخذ بلا منّه شهادة نجاحي
والعولمه تفتح قفول ٍ مغاليق=وهذا زمان الفتح والإنفتاحي
ماجيتها ناكر وملحد وزنديق=أعرف صلاح الدين وأعرف صلاحي
لكنّ يا شاهق بروس الشواهيق=دحدر على ماجاك وأسرح وتاحي
والحرّ لو يرضى بحكم المسابيق=شاب ونبت له في جناحه جناحي
ويزيد غبنه من فروخ الغرانيق=لا صنّفوها من طيور الفلاحي
رميت في وجه اللئيم المواثيق=وطلبت من وجه الكريم السماحي
ودوّنت في قسم المجانين تعليق=من يشتم المجنون ماهوب صاحي !





(( يا احمد نجاد ))



يا أحمد نجادي لبست الكوت=وعمامتك عنك مطروحه
دعوك قومٍ تجرّ الصوت=وأصواتهم منك مبحوحه
لو أنهم لابسين بشوت=عليك بدلتك مسموحه
أقلط على شاهي وبسكوت=وأطباق حلوه ومملوحه
حضرت بلسانك المفلوت=يا حاكمٍ شايفٍ روحهم
اهي غريبه بدون كروت=تدخل والأبواب مفتوحه
ليت المترجم معك مبخوت=ويشرح لك أوضاع مشروحه
ويعطيك سؤاله المغموت=في بحرنا وأنت سابوحه
لو يظهره من عيون الحوت=من شان في وجهك يشوحه
قبل المفاعل يضخّ زيوت=والنووي تكبر صروحه
والقدس ومعاهدة بيروت=وبغداد ومداوي جروحه
أشتالها فوق غصن التوت=يوم أثمر وزانت أطروحه
وأنته على سيرته منحوت=ورثت من دمّه الفوحه
حاكم ومستحكم وهلفوت=ولحيتك بالسمن ممسوحه
والله لوّ أنّا نشوتك شوت=ما قمت تنقز على اللوحه
خبيث نيّه عساك تموت=في مؤتمر قمّة الدوحه
وترجع لطهران بالتابوت=وتدفن وسيرتك مفضوحه !




(( يستر الله من دواي ومن طبيبي ))




أتحصّن مير ماعندي مناعه=يستر الله من دواي ومن طبيبي
خاطري مشحون من كثر إلتياعه=يجحد العلّه وأنا جرحي عطيبي
منكسر ما بين حبسه وإندفاعه=و واقف ٍ بين المنادي والمجيبي
وأنت يا اللي بيني وبينك طماعه=لا تسلّمني ظنوني وأتغدي بي
فرّد جروحي ليا جاتك جماعه=ولا تخليّها تجمّع لين أطيبي ؟
لا تجاملني وحبك عن قناعه=ما غصبتك بالمحبّه تنتحي بي
فيك روعه للغرام .. ومنك راعه=وأصدق العشّاق مقطوع النصيبي !
سمّ وأسلم وأبشر وسمع ٍ وطاعه=ضارب ٍ سمعي على صوتك صليبي
راح قلبي مثل أخوك من الرضاعه=ورحت عنيّ لا بعيد ولا قريبي
ما لحقني شك غير من القطاعه=يا الله أقطع ف الهوى شكيّ وريبي
لا تقول الحبّ يبغا له شجاعه=وأنت يا طيبك .. وأنا يا طيب طيبي !
حافظ ٍ تاريخ ميلادك وداعه=والزمان يدور والعمر يعدي بي
كل عام وكل يوم وكل ساعه=وأنت طيبّ ومتعافي يا حبيبي
وألاّ أنا عمري يخلف الله ضياعه=كلّ ما عيّد شبابي .. عاد شيبي
سيّدي كل ٍ بطبعه وإنطباعه=كان ما طريّت جيبك طرّ جيبي ؟
وأعتبرني شاعر وراعي بضاعه=يابس ٍ عرقي على الغصن الرطيبي
وأن سمعت اللي يطيب إلك إستماعه=قول صح لسان سداح العتيبي




(( بويتات))

قلبي اللـي لا يقـاد ولا يسـاق=ولا يرافق مـن يحـبّ يرافقـه
منعزل يخفق على نفس السيـاق=والمعنّـا مـا تهـنّـا خافـقـه
جلّ شانه .. خالق عروقه=دقاق ومع مجاريـه المحبّـه دافقـه
ولو يوقفّ بين لهفـه وإشتيـاق=قامت همـوم الليـال أتصافقـه
مير يا اللـي تنقضيـن الإتفـاق=وافقه من رفقتك .. مـا وافقـه
أفلحي يا بنت ما أحـبّ النفـاق=أنكشفتـي ف الغـرام أمنافقـه
راحت الفرقا مثل ضرب العراق=ما نبيها .. مير جـات أموافقـه



مسابقات الشعر


بين الطيور الجارحـه والداجنـه فـرق ٍ كبيـر=ولـو تختلـف بأشكالهـا مـا تتفـق بألوانهـا
ماهو مجرد ذي تطير وذيـك مـا تقـدر تطيـر=قلوبهـا بأسلوبهـا تنبـض علـى جنحانـهـا
واللي تغرّد كل ما صفـوّا لهـا الحشـد الغفيـر=أعـرف مرابطهـا ورابطهـا يعـرف الحانهـا
بالفصل الأول تنتفض وتموت بالفصـل الاخيـر=النفضـه النفضـه وصاحبهـا يمـوت وزانهـا
ويحاك خام اكفانها من صوف مدري من حريـر=ماهوب انا في ذمة اللـي حـاك خـام اكفانهـا
ماتت بعد ما صوّتت عاش الملك ..عاش الاميـر=اثر البلا فـي الكلمتيـن اللـي تسـمّ ابدانهـا
ماعاد عندي راي في اللي جاي وش ممكن يصير=ناس ٍ غياهـب جبّهـا فايـض بجهـد إيمانهـا
بالمختصر لا تبحث الموضوع يا الوجه السفيـر=والله ما حاس مسابقات الشّعـر غيـر لجانـها





















اتمنا ان ينال اعجابكم ,,, ما نقلت ,, ودمتم بود ولي تكمله بان الله لهذا الديوان






التوقيع

آخر تعديل محمد العميري يوم 12-01-2010 في 03:02 PM.
رد مع اقتباس
قديم 15-10-2009, 04:00 AM   رقم المشاركة : 2
معلومات العضو
عايض الهدلاني
رئيس مجلس الإدارة
 
افتراضي

الله واكبر

اي والله صح السان سداح العتيبي


ولا هنت يا صقر على هذا النقل المميز







التوقيع

لمتابعتنا على تويتر 3wazm1

رد مع اقتباس
[/table1]





قديم 15-10-2009, 08:45 AM   رقم المشاركة : 3
معلومات العضو
محمد العميري
 
الصورة الرمزية محمد العميري
 

 

 
وسام اعلى نقاط التقييم وسام اجمل تعليق على الصورة 
مجموع الاوسمة: 2 (أكثر» ...)
إحصائية العضو







اخر مواضيعي

محمد العميري غير متصل


افتراضي

[table1="width:95%;"]
يا سلااااام عزالله انه شاعر نادر وجوده ,,,لله دره ولله درك علي النقل المتميز ,,, لاهنت ياصقر وقد اضفت اول قصيده وهي من اروع قصائده الغزليه .
التوقيع

رد مع اقتباس
قديم 16-10-2009, 04:08 AM   رقم المشاركة : 4
معلومات العضو
سعد مبارك المسحمي
 
الصورة الرمزية سعد مبارك المسحمي
 

 

 
مسابقة قروبات الفوائد - المركز الاول العضو المميز - مسابقة القروبات وسام اعلى نقاط التقييم 
مجموع الاوسمة: 5 (أكثر» ...)
إحصائية العضو








اخر مواضيعي

سعد مبارك المسحمي غير متصل


افتراضي

الله الله

شاعر نادر الوجود

لله دره ولله درك أخي صقر على النقل المميز

صح السااان الشاعر سدااح

والسااانك على النقل الرااقي







التوقيع



Al_ms7mi

رد مع اقتباس
قديم 22-10-2009, 08:50 AM   رقم المشاركة : 7
معلومات العضو
مهرة الظفير
 
الصورة الرمزية مهرة الظفير
 

 

 
وسام العضو المميز للشهر 
مجموع الاوسمة: 1 (أكثر» ...)
إحصائية العضو







اخر مواضيعي

مهرة الظفير غير متصل


افتراضي

ياسلام عليك ياأخ صقر على هالجمع المميز من قصائد الشاعر سدااح ..

تحيتي لك وطاب منقولك







التوقيع

قالوا ظفيري قلت تاجً على الراس**وأكبر فخر لاقلت أصلي ظفيري
ربعي معطرت النمش يوم الاتعاس**في ساعة مافيه شور وشويري
نقمح على قبٍ ليا صار لولاس**كسابة النعمين دون القصيري
********
ظفران حنا.... وبالملاقا عسيرين ** وعنا انشد الاتراك والروم والفرس
بعض العرب قوته دمار الضعيفين** وحنا على بعض الدول نفرض الفلس


رد مع اقتباس
قديم 23-10-2009, 02:00 AM   رقم المشاركة : 8
معلومات العضو
صقر
 
الصورة الرمزية صقر
 

 

 
افتراضي

اقتباس
المشاركة الأصلية كتبت بواسطة عايض الهدلاني
الله واكبر

اي والله صح السان سداح العتيبي


ولا هنت يا صقر على هذا النقل المميز

شاكر لك المرور اخو عايض ولاهنت
اقتباس
المشاركة الأصلية كتبت بواسطة محمد العميري
[/table1]
[table1="width:95%;"]
يا سلااااام عزالله انه شاعر نادر وجوده ,,,لله دره ولله درك علي النقل المتميز ,,, لاهنت ياصقر وقد اضفت اول قصيده وهي من اروع قصائده الغزليه .

لاهنت يالعميري علي الاضافه الجميله
اقتباس
المشاركة الأصلية كتبت بواسطة السلطان
الله الله

شاعر نادر الوجود

لله دره ولله درك أخي صقر على النقل المميز

صح السااان الشاعر سدااح

والسااانك على النقل الرااقي

اقتباس
المشاركة الأصلية كتبت بواسطة ابونادر
بيض الله وجهك ياصقر

ووجهك يالسطان واسعدني المرور
اقتباس
المشاركة الأصلية كتبت بواسطة مهرة الظفير
ياسلام عليك ياأخ صقر على هالجمع المميز من قصائد الشاعر سدااح ..

تحيتي لك وطاب منقولك

تستاهلون كل خير ,, وشكرا علي المرور






التوقيع

رد مع اقتباس
قديم 25-10-2009, 05:06 PM   رقم المشاركة : 9
معلومات العضو
ابو خلف الصابري
 
الصورة الرمزية ابو خلف الصابري
 

 

 
افتراضي

مــا شـــاء اللـــــهـ تبــاارك الرحمــــــن
و اللهـ أنهـ شاعر بمعنى الكلمـــــــــــــهـ

و لا هنــت على المـوضوع الأكثـــــر مـــن رائــــع

و لا تبطي علينا بالديــــــوان الثاني

اللهـ يعطيـــك العــــــافيــــــــــــهـ






رد مع اقتباس
قديم 27-10-2009, 02:14 AM   رقم المشاركة : 10
معلومات العضو
عبدالله فالح بن رويشد
 
افتراضي

الله الله الله عليك ان هذا الشاعر اللي ما فيه مثله اثنين ما شاء الله عليه اشهد ان هذي القصايد ولا بلااش والله انها تطررررب وتهيّض لا هنت والله يعطيك العافيه يا صقر واشكرك على هذا المجهود اللي يعتبر انجاز ولا ننسى ابو عزيز على الاضافه واشكركم







رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 26 ( الأعضاء 0 والزوار 26)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
ديوان الشاعر مسلم البحيري محمد الأذينه ملتقى دواوين شعراء من الخليج العربي 11 23-08-2013 08:44 PM
ديوان الشاعر حمد السعيد مايهاب ملتقى دواوين شعراء من الخليج العربي 10 23-09-2011 10:20 PM
ديوان الشاعر خلف العتيبي.. مهرة الظفير ملتقى دواوين شعراء من الخليج العربي 41 03-12-2009 12:15 AM
ديوان الشاعر سعد بن علوش مايهاب ملتقى دواوين شعراء من الخليج العربي 8 02-11-2009 01:31 PM
ديوان الشاعر عبدالله بن عون محمد العزران ملتقى دواوين شعراء من الخليج العربي 9 29-08-2009 12:07 AM


الساعة الآن 08:11 PM.


Powered by vBulletin® Version 3.8.5, Copyright ©2000 - 2014, Jelsoft Enterprises Ltd. Hosted By Beethost.net
(جميع ما يكتب في الملتقى الثقافي لأبناء قبيلة العوازم لا يعبر عن وجهة نظر ملتقى أبناء قبيلة العوازم بل يعبر عن وجهة نظر كاتبه )